സ്വപ്‌ന പദ്ധതികൾ യാഥാർഥ്യമാക്കിയ  ഭരണാധിപൻ 

അഡ്വ .പി .എസ് .ശ്രീകുമാർ

  ഉമ്മൻ ചാണ്ടിയിലെ  രാഷ്ട്രീയക്കാരൻ  വളരെയേറെ പ്രത്യേകതകളുള്ള  ഒരു നേതാവാണ്.   തൻറ്റെ  നിയോജക മണ്ഡലമായ  പുതുപ്പള്ളിയിലെ  ജനങ്ങളുടെ സുഖദുഃഖങ്ങളിൽ  ഒന്നൊഴിയാതെ    പങ്കുചേരുന്ന  നിയമസഭാ സാമാജികനാ യി ഇരിക്കെത്തന്നെ  ലോകത്തെവിടെയുമുള്ള മലയാളികൾക്ക്  ഒരാശ്രയമായി വിളിപ്പുറത്തു അദ്ദേഹം ഉണ്ടായിരുന്നു.  അതിലൊന്നും രാഷ്ട്രീയ പരിഗണനകൾ  കടന്നുവന്നിരുന്നില്ല .  ഭരണത്തിലാണെങ്കിലും പ്രതിപക്ഷത്താണെങ്കിലും  അതിനു യാതൊരു മാറ്റവുമിലായിരുന്നു.  2004 ൽ  സുനാമി തിരമാലകൾ   തീരപ്രദേശങ്ങളിൽ  ആഞ്ഞുവീശിയപ്പോളും , 2018 ൽ   കേരള ജനതയെ   പ്രളയം  വിഴുങ്ങിയപ്പോളും, 2020 ൽ കേരളത്തിലും  ലോകത്തിൻറ്റെ  വിവിധ ഭാഗങ്ങളിലുമുള്ള മലയാളികളെ കൊറോണ  മഹാമാരി  കാർന്നു തിന്നപ്പോളും  മലയാളികളുടെ  ആശ്രയവും അത്താണിയുമായി  ഉമ്മൻ ചാണ്ടി സജീവമായി  രംഗത്തുണ്ടായിരുന്നു. കോറോണയുടെ ആദ്യനാളുകളിൽ പതിനായിരത്തില്പരം ഫോൺ കോളുകളാണ്  അദ്ദേഹം അറ്റൻഡ് ചെയ്തത്.  കേരള  ജനത ഇത്രമാത്രം സ്നേഹവും വാത്സല്യവും നൽകിയ  മറ്റൊരു നേതാവില്ല. 

ബാംഗ്ലൂരെ  എച് .സി.ജി ആശുപത്രിയിൽ  ചികിത്സയിൽ ഇരിക്കുന്ന അവസരത്തിലും   അദ്ദേഹത്തെ സമീപിച്ച അവിടത്തെ ജീവനക്കാർക്കുവേണ്ടി  ഇടപെട്ട  നേതാവാണ് അദ്ദേഹം.  അദ്ദേഹത്തിന്റ്റെ  ചികിത്സ സഹായത്തിനു എത്തിയ മലയാളിയായ ഒരു ആശുപത്രി ജീവനക്കാരിയുടെ വീട് ജപ്തി ചെയ്യുമെന്നറിഞ്ഞു  ആശുപത്രി കിടക്കയിൽ നിന്നും  ജപ്തി ഒഴിവാക്കുവാൻ അദ്ദേഹം ശ്രമിച്ചു.

  വിമർശനം അനിവാര്യം 

          കുറെ വര്ഷങ്ങള്ക്കുമുമ്പ്  സിനിമാ  നടനായ സിദ്ദിക്കുമായി  അദ്ദേഹം നടത്തിയ അഭിമുഖത്തിൽ,   പൊതുരംഗത്ത്  അദ്ദേഹത്തെ നയിക്കുന്ന  തത്വം എന്താണെന്ന്   വ്യക്തമാക്കി. "'ജനാധിപത്യത്തിൽ എതിർപ്പ്   തെറ്റല്ല. സമരങ്ങൾ വേണ്ടിവരും. അതൊക്കെ ജനാധിപത്യത്തിന് ശക്തിപകരുന്ന ഘടകങ്ങളാണ്.  എനിക്കുള്ള  ഏറ്റവും വലിയ ശക്തി, എനിക്കെതിരെയുള്ള വിമർശനങ്ങളാണ്.  കാരണം, ഞാനെപ്പോഴും കെയർ ഫുള്ളായിരിക്കും.  ചെറിയ തെറ്റുപോലും വിമര്ശിക്കപ്പെടുമെന്നു പറയുമ്പോൾ വളരെ സൂക്ഷിച്ചായിരിക്കും പ്രവർത്തിക്കുക.  ജനാധിപത്യത്തിൽ വിമര്ശനവും പ്രതിപക്ഷവും എല്ലാം വേണം". വിശ്വസിക്കുന്നത് പറയുകയും, പറയുന്നത് പ്രവർത്തിക്കുകയും ചെയ്യുന്ന അദ്ദേഹം, ഭരണത്തിൽ ഇരുന്നപ്പോൾ ഉണ്ടായ വിമർശനങ്ങളെയൊന്നും  അസഹിഷ്ണതയോടെ കാണുകയോ, വിമർശകരെ  അധിക്ഷേപിക്കുകയോ ചെയ്തിട്ടില്ല.  വിമർശനങ്ങളിൽ കഴമ്പുണ്ടെങ്കിൽ  അതുൾക്കൊള്ളാൻ അദ്ദേഹം മടിച്ചിട്ടുമില്ല.  ഇതേ സമീപനം തന്നെയായിരുന്നു  വികസന കാര്യങ്ങളിലും അദ്ദേഹത്തെ നയിച്ചത്.  ദീർഘ ദൃഷ്ടിയോടെയായിരുന്നു വികസനകാര്യങ്ങളെ അദ്ദേഹം സമീപിച്ചിരുന്നത്.

ഭരണരംഗത്തേക്കുള്ള പ്രവേശനം 

      ഭരണ രംഗത്ത്  അദ്ദേഹം ആദ്യമായി പ്രവേശിച്ചത് , 1977 ലെ  ആൻറണി  മന്ത്രിസഭയിൽ, തൊഴിൽ-ഭവന  മന്ത്രിയായായിട്ടായിരുന്നു.  ആ  കാലഘട്ടത്തിലാണ് തിരുവനന്തപുരം  ചെങ്കൽച്ചൂള കോളനിയിലെ അധസ്ഥിത  വിഭാഗങ്ങൾ താമസിച്ചിരുന്ന , ചേരികൾ മാറ്റി  ഫ്ലാറ്റുകൾ    നിർമ്മിച്ചു നൽകുവാനുള്ള പദ്ധതിയ്ക്കു തുടക്കം കുറിച്ചത്. അദ്ദേഹം യൂത്ത് കോൺഗ്രസ് പ്രസിഡൻറ്  ആയിരുന്നപ്പോൾ ഉന്നയിച്ച ആവശ്യമായിരുന്നു തൊഴിലില്ലാത്ത ചെറുപ്പക്കാർക്ക് തൊഴിലില്ലായ്‌മ  വേതനം എന്നത്. തൊഴിൽ മന്ത്രിയായി അധികാരത്തിലേറി അധികം വൈകാതെ ആ ആവശ്യം അദ്ദേഹം നടപ്പിലാക്കി.  അതുപോലെ അസംഘടിതരായ ചുമട്ടുതൊഴിലാളികളുടെ ക്ഷേമത്തിനായി  ക്ഷേമനിധി ബില്ലും പാസ്സാക്കിയത്  ഈ കാലയളവിലായിരുന്നു. 1981 ൽ ആഭ്യന്ത മന്ത്രി ആയിരുന്ന അവസരത്തിലാണ് പൊലീസിൽ  ആധുനികവൽക്കരണത്തിന്  തുടക്കം കുറിച്ചത് .  ബ്രിട്ടീഷ് ഭരണ കാലം  മുതൽ പോലീസിന്റ്റെ  യൂണിഫോം ആയിരുന്ന ട്രൗസർ മാറ്റി പാന്റ്സ് കൊണ്ടുവന്നു. അതുപോലെ തീപ്പെട്ടിക്കൊള്ളിപോലത്തെ തൊപ്പിമാറ്റി, ഇപ്പോൾ  ഉപയോഗത്തിലുള്ള തൊപ്പി നൽകി.     മുഖ്യമന്ത്രി ആയ രണ്ടവസരങ്ങളിലും കേരളത്തെ കുറിച്ചുള്ള തൻറ്റെ വികസന സ്വപ്‌നങ്ങൾ ഒന്നൊന്നായി നടപ്പിലാക്കുവാൻ അദ്ദേഹം ശുഷ്‌കാന്തി കാട്ടി. 2004 ൽ ആദ്യമായി മുഖ്യമന്ത്രി ആയ   അവസരത്തിലാണ്, ദാരിദ്ര്യരേഖയ്ക്ക് താഴെയുള്ള 20 ലക്ഷം കുടുംബങ്ങൾക്ക് 3 രൂപയ്ക്  പ്രതിമാസം 25 കിലോ അരി ,ആരോഗ്യഇൻഷുറൻസ് പദ്ധതി , സ്കൂൾ കുട്ടികൾക്ക് ഉച്ചഭക്ഷണത്തോടൊപ്പം മുട്ട നൽകുന്ന പദ്ധതി, എന്നിവ നടപ്പിലാക്കിയത്  . തിരുവനന്തപുരം നഗരത്തിലെ റോഡുകൾ ആധുനികവൽക്കരിച്ചു .പാളയം അടിപ്പാത സമയബന്ധിതമായി പൂർത്തീകരിച്ചു.  ഇതിൻറ്റെ  ഭാഗമായി രണ്ടു ഫ്‌ളൈഓവറുകൾ നിർമിക്കാനും നടപടി തുടങ്ങി . കരിപ്പൂർ വിമാനത്താവളത്തിന് അന്താരാഷ്ട്ര വിമാനത്താവളമെന്ന പദവി ലഭ്യമാക്കി . മലയോര മേഖലയുടെ വികസനം ലക്ഷ്യമാക്കി മലയോര പാത പദ്ധതിക്ക് തുടക്കമിട്ടു.  ആഗോള ഐ.ടി കമ്പനികളെ ആകര്ഷിയ്ക്കുവാൻ സ്മാർട്ട് സിറ്റി കൊച്ചിയിൽ സ്ഥാപിയ്ക്കാൻ തീരുമാനിച്ചു.  എന്നാൽ അതിനെതിരെ അന്നത്തെ പ്രതിപക്ഷനേതാവ് ഹൈക്കോടതിയിൽ കേസുമായി പോയി.  അനുകൂലമായ വിധി ഹൈക്കോടതിയിൽ നിന്ന് ലഭിച്ചപ്പോഴേയ്ക്കും  തെരഞ്ഞെടുപ്പ് പ്രഖ്യാപിച്ചു.  അച്യുതാനന്ദൻ  സർക്കാർ ആ പദ്ധതിക്ക് തറക്കല്ലിടീൽ നടത്തിയെങ്കിലും,.  പദ്ധതിയുടെ നിർമാണ പ്രവർത്തനങ്ങൾ  ആരംഭിച്ചതും പൂർത്തീകരിച്ചതും  ഉമ്മൻ ചാണ്ടി 2011 ൽ വീണ്ടും മുഖ്യമന്ത്രി  ആയപ്പോഴാണ്. 

 ഡൽഹി മെട്രോ യാഥാർഥ്യമായ സമയത്താണ് കൊച്ചി മെട്രോ എന്ന ആശയം  കേരളത്തിൽ ഉണ്ടാകുന്നത്.  ഡൽഹി മെട്രോയിൽ ഒരു യാത്രകഴിഞ്ഞു വന്ന ഉടൻതന്നെ ഇക്കാര്യം അദ്ദേഹം ഉദ്യോഗസ്ഥരുമായി ചർച്ച ചെയ്തു. 2005  ഓഗസ്റ്റിൽ ചേർന്ന മന്ത്രിസഭാ യോഗം കൊച്ചി മെട്രോ നടപ്പാക്കാൻ തീരുമാനിക്കുകയും  തുടർ നടപടികൾ കൈക്കൊള്ളുകയും ചെയ്തു. അപ്പോഴേക്കും തെരഞ്ഞെടുപ്പുകഴിഞ്ഞു   അച്യുതാനന്ദൻ സർക്കാർ അധികാരത്തിലെത്തി. അച്യുതാനന്ദൻ സർക്കാരിന്റെ അഞ്ചുവര്ഷവും കൊച്ചിമെട്രോയെക്കുറിച്ചു ചർച്ചകളും തർക്കങ്ങളും നടന്നതല്ലാതെ ക്രിയാത്മകമായ ഒരു നടപടിയും കൈക്കൊണ്ടില്ല. പിന്നീട് 2011 ൽ അദ്ദേഹം വീൺടും മുഖ്യമന്ത്രി ആയപ്പോഴാണ്  കൊച്ചി മെട്രോ നടപ്പിലാക്കാനുള്ള നടപടികൾ എടുത്തത്. മെട്രോമാൻ ഇ. ശ്രീധരൻറ്റെ  മേൽനോട്ടത്തിൽ, ഡൽഹി മെട്രോ  റെയിൽ കോർപറേഷനെക്കൊണ്ട് ഈ പദ്ധതി നടപ്പിലാക്കിക്കണമെന്നതായിരുന്നു കേരളത്തിലെ ജനങ്ങളുടെ  ആവശ്യം. പദ്ധതിയുമായി ബന്ധപ്പെട്ട ചില ഉന്നത ഉദ്യോഗസ്ഥർ ഡി എം ആർ സിയെയും  ശ്രീധരനെയും ഒഴിവാക്കുവാൻ ശ്രമിച്ചു. മന്ത്രിസഭായോഗം കൂടി  ഇ. ശ്രീധരൻറ്റെ  നേതൃത്വത്തിൽ ഡി എം ആർ സി മുഖാന്തിരം പദ്ധതി നടപ്പിലാക്കുവാൻ തീരുമാനിച്ച്, കേന്ദ്ര സർക്കാരിനെയും  ഡൽഹി സർക്കാരിനെയും അറിയിച്ചു.   2016 ൽ മുഖ്യമന്ത്രി സ്ഥാനം ഒഴിയുന്നതിനു മുമ്പുതന്നെ കൊച്ചി മെട്രോയുടെ പരീക്ഷണ ഓട്ടം വിജയകരമായി പൂർത്തിയാക്കിയിരുന്നു.

നൂറുദിന പരിപാടികൾ 

        ഉമ്മൻ ചാണ്ടിസർക്കാർ 2011  മെയ് 18 നു അധികാരമേറ്റയുടൻ തന്നെ 100  ദിന പരിപാടി   പ്രഖ്യാപിച്ചു. ഒരു ഭരണാധികാരിയുടെ നിശ്ചയദ്ധാർഢ്യവും  , ദിശാബോധവും പ്രകടിപ്പിച്ച  പദ്ധതിയായിരുന്നു അത്. . നൂറാം ദിവസം വി.ജെ.ടി ഹാളിൽ വച്ച് നടത്തിയ  പ്രോഗ്രസ്സ് റിപ്പോർട്ട് അവതരണത്തിൽ,  പ്രഖ്യാപിച്ച 107 പരിപാടികളിൽ 102 എണ്ണവും,  100 ദിവസകാലയളവിനുള്ളിൽ  നടപ്പിലാക്കിയ കാര്യം  പൊതുജനങ്ങളെ പ്രോഗ്രസ്സ് റിപ്പോർട്ടിലൂടെ  അറിയിച്ചു . BPL  റേഷൻകാർഡ് ഉടമകൾക്ക് ഒരു  രൂപയ്ക്ക് 25  കിലോ അരി, റേഷൻ കാർഡിനായി അപേക്ഷിച്ചവർക്കെല്ലാം   റേഷൻ കാർഡ് അനുവദിച്ചു നൽകൽ ,  മന്ത്രിമാരുടേയും അവരുടെ പേർസണൽ സ്റ്റാഫിന്റ്റെയും  സ്വത്ത് വെളിപ്പെടുത്തൽ, മുഖ്യമന്ത്രിയുടെ ചേംബറിൽ നിന്നുമുള്ള തത്സമയ വെബ് കാസ്റ്റിംഗ് എന്നിവയെല്ലാം നൂറുദിന പരിപാടിയിൽ ഉൾപ്പെടുത്തി നടപ്പിലാക്കി.

വൻകിട പദ്ധതികൾക്കായി                

       നമുക്കെല്ലാം അറിയാവുന്നതുപോലെ  വൻകിട പദ്ധതികൾ കേരളത്തിൽ പൊതുവെ കുറവാണ്. .  ജനസാന്ദ്രത കൂടിയതും, സ്ഥലത്തിൻറ്റെ  ദൗർലഭ്യവും, ഉയർന്ന വിലയും കാരണം വൻകിട വ്യവസായികൾ  കേരളത്തിലേക്ക് വരാത്ത സാഹചര്യമാണ്.  സര്ക്കാരിന്റ്റെ   ആഭിമുഖ്യത്തിലുള്ള  വൻകിട പദ്ധതികൾ മാത്രമാണ് കേരളത്തിൽ കഴിഞ്ഞ അരനൂറ്റാണ്ടായി  ഉണ്ടായിരുന്നത്.  അതുതന്നെയും വിരലിലെണ്ണാവുന്നവ മാത്രം.  കാനഡ സർക്കാരിന്റ്റെ സഹായത്തോടെ 1973 ൽ  ഇടുക്കി ജലപദ്ധതി  നടപ്പിലാക്കിയതിന്   ശേഷം,  പിന്നീടുണ്ടായ ഒരു വൻകിട പദ്ധതി എന്ന് പറയാവുന്നത്  പൊതു-സ്വകാര്യ സംയുക്ത സംരംഭമായ നെടുമ്പാശ്ശേരി  വിമാനത്താവളം മാത്രമായിരുന്നു .  ഇതിനൊരു മാറ്റം വരുത്തുവാൻ  മുഖ്യമന്ത്രി എന്ന നിലയിൽ അദ്ദേഹം ശ്രമിച്ചു.  2005 ലെ  ഉമ്മൻചാണ്ടി സർക്കാർ തുടക്കം കുറിച്ച   കൊച്ചി മെട്രോ  പദ്ധതിക്ക് വീണ്ടും  ജീവൻ വചു.. കൊച്ചി മെട്രോക്ക് തടസ്സമായി ഒട്ടേറെ കാര്യങ്ങൾ പൊന്തിവന്നു. DMRC യെ പദ്ധതിയുടെ നടത്തിപ്പിന് ചുമതല ഏൽപ്പിക്കാൻ  ഉദ്യോഗസ്ഥ പ്രമുഖർ  തടസ്സവാദങ്ങൾ ഒരുപാടു ഉന്നയിച്ചു.  അതിനെ അതിജീവിച്ചു DMRC  ക്ക്   ചുമതല നല്കാൻ സർക്കാർ തീരുമാനിച്ചെങ്കിലും  അതേറ്റെടുക്കാൻ DMRC  തയാറായില്ല. ഒടുവിൽ   ഉമ്മൻചാണ്ടിയും, അന്ന് സംസ്ഥാനത്തു റയിൽവേയുടെ  ചുമതലയുണ്ടായിരുന്ന മന്ത്രി ആര്യാടൻ മുഹമ്മദും കൂടി കേന്ദ്ര മന്ത്രി കമൽനാഥിനെയും  മുഖ്യമന്ത്രിയായിരുന്ന ഷീല ദീക്ഷിതിനെയും  നേരിട്ടുകണ്ടാണ്  5500  കോടി മുതൽ മുടക്കുള്ള  കൊച്ചി മെട്രോയുടെ നിർമാണം ഏറ്റെടുപ്പിച്ചത് .  മുഖ്യമന്ത്രി സ്ഥാനത്തു നിന്നും ഒഴിയുന്നതിന് മുമ്പുതന്നെ  ആദ്യഘട്ട നിർമാണം പൂർത്തിയാക്കി  ട്രയൽ റണ്ണും നടത്തി.

                            സംസ്ഥാന സർക്കാരിന്റ്റെ  സഹകരണത്തോടെയാണ് കേന്ദ്ര പൊതുമേഖലാ സ്ഥാപനമെന്ന നിലയിൽ  1966 ൽ  കൊച്ചി റിഫൈനറി ആരംഭിച്ചത്. പിന്നീട് ഇതിനെ ഭാരത് പെട്രോളിയം കോര്പറേഷന് ഏറ്റെടുത്തു. 2012 ലെ" എമേർജിങ് കേരള " ആഗോള സംഗമത്തിൽ പങ്കെടുത്തപ്പോഴാണ്   20000  കോടി രൂപയുടെ വികസന പദ്ധതിക്ക് ബി പി സി എൽ രൂപരേഖ ഉണ്ടാക്കിയത്.  ആഗോള സംഗമം ഉദ്‌ഘാടനം ചെയ്യാനെത്തിയ പ്രധാന മന്ത്രി മൻമോഹൻ സിംഗുമായി  ഉമ്മൻ ചാണ്ടി നടത്തിയ ചർച്ചയെ തുടർന്നാണ്  ബ്രിഹത്തായ  ഈ പദ്ധതിക്ക് കേന്ദ്ര സർക്കാർ പച്ച കൊടി  കാട്ടിയതു.  ഇത്  നടപ്പിലാക്കുവാൻ  സ്ഥലം ഏറ്റെടുത്തു നൽകിയതിന് പുറമെ , നികുതി ഇളവുൾപ്പെടെ  ഒട്ടേറെ  സൗകര്യങ്ങളാണ് സംസ്ഥാന സർക്കാർ  നൽകിയത്.  നാല് വര്ഷം കൊണ്ട്  വികസന പ്രവർത്തനങ്ങൾ പൂർത്തീ കരിച്ചു കഴിഞ്ഞപ്പോൾ, ബി പി സി എല്ലിന്റ്റെ   കീഴിലെ ഏറ്റവും വലിയ റിഫൈനറി യായി  ഇത് മാറി.  ഇന്ന്  കേരളത്തിൽ ഏറ്റവും കൂടിയ മുതല്മുടക്കുള്ള പൊതുമേഖലയിലെ  പദ്ധതിയും  ഇതാണ്.

             വേഴാമ്പലിനെപോലെ  വികസനത്തിന് നോക്കിയിരുന്ന  ഉത്തര മലബാറിന്  പ്രതീക്ഷനൽകിയാണ് കണ്ണൂർ എയർപോർട്ട് പദ്ധതി   പ്രഖ്യാപിച്ചത്.   ഉമ്മൻചാണ്ടി  മുഖ്യമന്ത്രി ആയ ശേഷമാണ്  2300 കോടി  ചെലവ് പ്രതീക്ഷിച്ച നിർമാണ കരാർ എൽ ആൻഡ് ടി  കമ്പനിയെ ഏൽപ്പിച്ചത്. 2016  ഫെബ്രുവരിയിൽ  റൺവെ  നിർമാണം പൂർത്തിയാക്കി എയർ ഫോഴ്സ് വിമാനത്തിന്റ്റെ   ട്രയൽ റണ്ണും  നടത്തിക്കുവാൻ ഉമ്മൻചാണ്ടിക്കു സാധിച്ചു. വീണ്ടും  രണ്ടു വർഷങ്ങൾക്കു  ശേഷമാണ് ടെർമിനൽ  നിർമാണം പൂർത്തിയാക്കി  ഔപചാരിക ഉദ്‌ഘാടനം പിണറായി സർക്കാർ നടത്തിയത്. .

 ബൈപാസ്സുകൾ യാഥാർഥ്യത്തിലേക്ക് 

             നാല്  പതിറ്റാണ്ടായുള്ള  കേരളത്തിൻറ്റെ  ആവശ്യമാണ് പാറശ്ശാല മുതൽ മഞ്ചേശ്വരം വരെയുള്ള നാല്  വരി  ദേശീയ പാത. .ഭൂമി ഏറ്റെടുക്കൽ , അലൈൻമെന്റ് , തുടങ്ങിയ തർക്കങ്ങളിൽ പെട്ട് ഈ ആവശ്യം  ശീതീകരണപ്പെട്ടിയിലായപ്പോൾ  ഉമ്മൻ ചാണ്ടിയുടെ മനസ്സിലുദിച്ച ആശയമാണ്  പ്രധാന നഗരങ്ങളിലെ ഗതാഗത തടസ്സങ്ങൾ മറികടക്കാനായി  ബൈപാസുകൾ മാത്രമായി ,  ദേശീയ പാതാ  അതോറിറ്റിയുടെ  അംഗീകാരത്തോടെ, നിർമിക്കുവാൻ സാധിക്കുമോ എന്നുള്ളത് .തലശ്ശേരി,കോഴിക്കോട്,ആലപ്പുഴ, കൊല്ലം, തിരുവനന്തപുരം എന്നിവിടങ്ങളിൽ ബൈപാസ് നിർമിക്കാൻ സ്ഥലം ഏറ്റെടുത്തിട്ട്  നാലുപതിറ്റാണ്ടു കഴിഞ്ഞെങ്കിലും  ദേശീയ പാതക്കൊപ്പമേ ബൈ പാസ് നിർമാണവും  നടത്താൻ സാധിക്കു എന്നായിരുന്നു കേന്ദ്ര നയം.ദേശീയ പാത വികസനത്തോടൊപ്പം ബൈപാസ് വികാസം എന്ന കടുംപിടുത്തതിൽ നിന്നും കേന്ദ്ര സർക്കാരിനെ പിന്തിരിപ്പിക്കുവാൻ മുഖ്യമന്ത്രി എന്ന നിലയിൽ ഉമ്മൻ ചാണ്ടി ശ്രമിച്ചു. ദേശീയ പാതക്കായി 45  മീറ്ററിൽ സ്ഥലം ഏറ്റെടുക്കുന്നതിനെതിരെ പല സംഘടനകളും  പ്രക്ഷോഭം നടത്തി  സർവ്വേ പോലും നിർത്തിവെക്കേണ്ടി വന്ന സാഹചര്യമായിരുന്നു അന്ന്.. സ്ഥലം ഏറ്റെടുക്കൽ  ആവശ്യമില്ലാത്ത ബൈപാസ്സുകളെ ഇതിൽ നിന്നും ഒഴിവാക്കുവാൻ പറ്റുമോ എന്ന് ആരായാൻ അദ്ദേഹം തീരുമാനിച്ചു.  അതിനായി  പ്രധാനമന്ത്രിയായിരുന്ന മൻമോഹൻ സിംഗിനെ നേരിട്ട് കണ്ട് അദ്ദേഹം ആവശ്യപ്പെട്ടു.  ബൈപാസ് വികസന ചെലവിന്റ്റെ  പകുതി സംസ്ഥാന സർക്കാർ    വഹിക്കാമെന്ന ഉറപ്പുകൊടുത്താണ് ഈ ബൈപാസ്സുകളെയെല്ലാം സ്റ്റാൻഡ് എലോൺ  പദ്ധതികളാക്കി മാറ്റിയത്. ഈ നയം മാറ്റം രാജ്യത്തുതന്നെ ആദ്യമായിരുന്നു. കോഴിക്കോട് ബൈപാസ് നിർമാണം പൂർത്തിയാക്കുകയും,  ബാക്കിയുള്ളവയുടെ   നിർമാണപ്രവര്ത്തനങ്ങൾക്കു തുടക്കം കുറിക്കുവാനും  ഉമ്മൻ ചാണ്ടി സർക്കാരിന് കഴിഞ്ഞു.  

           സംസ്ഥാന  രൂപീകരണ കാലം മുതലുള്ള ഒരു സ്വപ്ന പദ്ധതിയായിരുന്നു വിഴിഞ്ഞം തുറമുഖനിർമാണം. തീരത്തു  നിന്ന് ഒരു നോട്ടിക്കൽ മൈൽ അകലം വരെ സ്വാഭാവികമായ 24 മീറ്റർ ആഴം വിഴിഞ്ഞതിൻറ്റെ മാത്രം പ്രത്യേകതയാണ്. ഇക്കാരണത്താൽ മറ്റു തുറമുഖങ്ങളെപ്പോലെ ഇടയ്ക്കിടയ്ക്ക് ചെലവേറിയ ഡ്രെഡ്ജിങ് ആവശ്യമില്ല. നിലവിൽ , ഇന്ത്യയിൽ കണ്ടെയ്നർ ട്രാൻസ്ഷിപ്മെൻറ്റ് ടെര്മിനലുകളൊന്നും ഇല്ല .ഇതിനായി നമ്മൾ ആശ്രയിയ്ക്കുന്നതു ദുബായ് , കൊളമ്പോ ,സിംഗപ്പൂർ തുടങ്ങിയ തുറമുഖങ്ങളെയാണ്. വിഴിഞ്ഞം തുറമുഖ പദ്ധതി നടപ്പിലായാൽ രാജ്യത്തിന് വിദേശ നാണ്യഇനത്തിൽ കോടിക്കണക്കിനു രൂപ ലാഭിയ്ക്കുവാൻ സാധിയ്ക്കും. 2001 ലെ ആൻറണി സർക്കാർ വിഴിഞ്ഞം തുറമുഖം വികസിപ്പിയ്ക്കുവാൻ തീരുമാനിച്ചെങ്കിലും, കോടതി കേസുകൾ കാരണം മുന്നോട്ടു പോകുവാൻ സാധിച്ചില്ല. പിന്നീട് വന്ന അച്യുതാനന്ദൻ സർക്കാരിന്റ്റെ കാലത്തും പദ്ധതി കടലാസിൽതന്നെയിരുന്നു .ഈ പദ്ധതിയ്‌ക്കെതിരെ രാജ്യത്തിനകത്തും പുറത്തുമുള്ള  വിവിധ കേന്ദ്രങ്ങളിൽ നിന്നും ഉയർന്ന എല്ലാ എതിർപ്പുകളെയും അവഗണിച്ചു കൊണ്ടാണ് പദ്ധതിയുമായി മുന്നോട്ടു പോകാൻ ഉമ്മൻ ചാണ്ടി സർക്കാർ തീരുമാനിച്ചത്.  6200  കോടി രൂപയുടെ പദ്ധതിയിൽ 6000  കോടി രൂപയുടെ അഴിമതിയാണ് സി.പി.എം ഉന്നയിച്ചത്. തിരുവന്തപുരത്തിന്റ്റെയും കേരളത്തിൻറ്റെയും വികസനത്തിൽ  നിർണായകമായ സ്ഥാനം ഈപദ്ധതിയ്ക്കുണ്ടെന്നു തിരിച്ചറിഞ്ഞ മുഖ്യമന്ത്രി ഉമ്മൻ‌ചാണ്ടി, എല്ലാതടസ്സവാദങ്ങളെയും  അതിജീവിച്ചാണ്  അദാനി പോർട്ടുമായി കരാറുണ്ടാക്കിയത്. ആയിരം ദിവസങ്ങൾക്കുള്ളിൽ സമയബന്ധിതമായി പദ്ധതി നടപ്പിലാക്കാനാണ് ലക്ഷ്യമിട്ടിരുന്നത്.  

റെയിൽവേ ഗതാഗതത്തിലെ  കാലതാമസം  ഒഴിവാക്കുന്നതിനും , വേഗത്തിൽ റെയിൽവേ ഗതാഗതം  മാറ്റുന്നതിൻറ്റെയും   ഭാഗമായി, തിരുവനന്തപുരത്തുനിന്നും ചെങ്ങന്നൂർവരെ 125  കിലോ മീറ്റർ ദൂരത്തിൽ സബർബൻ ട്രെയിൻ സർവീസ് ആരംഭിക്കുന്നതിനായി റെയ്ൽവേയുമായി ധാരണ പത്രം ഒപ്പുവെച്ചു .  റെയിൽവേയും സംസ്ഥാന സർക്കാരും തുല്യമായി മുതൽ മുടക്കി വേഗതയാർന്ന ട്രെയിൻ സർവീസ് ആരംഭിക്കുവാനും പിന്നീട് വടക്കൻ ഭാഗങ്ങളിലേക്ക്  സർവീസ് നീട്ടുവാനുമാണ്  ഉദ്ദേശിച്ചത്.  എന്നാൽ എൽ ഡി എഫ് സർക്കാർ ഈ പദ്ധതി ഉപേക്ഷിച്ചു . തിരുവനന്തപുരം, കോഴിക്കോട് മോണോ റെയിൽ പ്രൊജെക്ടുകൾ തുടങ്ങാൻ തീരുമാനിച്ചിരുന്നെങ്കിലും , അതും പിണറായി സർക്കാർ വേണ്ടെന്നു വച്ച്.

            കഴിഞ്ഞ യു ഡി എഫ്  സർക്കാരിന്റ്റെ  ആശയമായിരുന്നു കേരളത്തിൽ ഒരു ജീവശാസ്ത്ര പാർക്ക് സ്ഥാപിക്കണമെന്നത്.  ആന്ധ്രയും, തമിഴ്‌നാടും  ഉൾപ്പെടെയുള്ള സംസ്ഥാനങ്ങൾ  ഏറെ ദൂരം മുന്നോട്ടു പോയ സാഹചര്യത്തിലാണ്  എത്രയും വേഗം ജീവ ശാസ്ത്ര പാർക്ക് സ്ഥാപിക്കണമെന്നു സർക്കാർ തീരുമാനിച്ചു KSIDC യോട്  പദ്ധതി രേഖ തയ്യാറാക്കാൻ ആവശ്യപ്പെട്ടത്.  ഇതിനായി ആദ്യ ഘട്ടത്തിൽ  75  ഏക്കർ  സ്ഥലം തിരുവനന്തപുരത്തിനടുത്തു തോന്നക്കലിൽ ഏറ്റെടുത്തുകൊണ്ട് 2013 ൽ  പാർക്കിന്റ്റെ  ഉദ്‌ഘാടനം നിർവഹിച്ചു.  വൈറോളജി ഇൻസ്റ്റിറ്റ്യൂട്ട്, ശ്രീചിത്ര തിരുനാൾ മെഡിക്കൽ ഇൻസ്റ്റിട്യൂട്ടിന്റെ   ബിയോടെക്നോളജി വിഭാഗം ഉൾപ്പെടെ നിരവധി സ്ഥാപനങ്ങളാണ് തോന്നക്കലെ  ലൈഫ് സയൻസസ് ഇൻസ്റ്റിട്യൂട്ടിൽ  പ്രവർത്തിക്കുന്നത്. ഇന്ത്യയിലെ തന്നെ തലയെടുപ്പുള്ള ജീവ ശാസ്ത്ര പാർക്കുകളിൽ ഒന്നായി ഇത് മാറി. 

 

 കേരളത്തിന് ഐ ടി ഐ 

                   കേരളത്തിൻറ്റെ  ദീർഘനാളായുള്ള  ഒരു ആവശ്യമായിരുന്നു നമ്മുടെ സംസ്ഥാനത്തു ഒരു ഐ ഐ ടി  വേണമെന്നുള്ളത്.  ആ സ്വപ്നമാണ്, അദ്ദേഹത്തിന്റ്റെ  ശ്രമഫലമായി  2015 ൽ  പാലക്കാട്   സാധിതമായത് . അതുപോലെ , ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് എഡ്യൂക്കേഷൻ ആൻഡ് റിസർച്ച്  തിരുവനന്തപുരത്തെ വിതുരയിൽ തുടങ്ങാൻ  സാധിച്ചതും അദ്ദേഹത്തിന്റ്റെ  നിരന്തരമായ ശ്രമഫലമായാണ്.  സംസ്ഥാനത്തെ സാങ്കേതിക വിദ്യാഭ്യാസ സ്ഥാപങ്ങളെ  എല്ലാം അഫിലിയേറ്റ് ചെയ്തുകൊണ്ട്  ഒരു സാങ്കേതിക സർവകലാശാല  എന്നതും  സംസ്ഥനത്തിന്റ്റെ  ദീർഘകാല ആവശ്യമായിരുന്നു. അതാണ്  എ .പി.ജെ.അബ്ദുൽ കലാം   സാങ്കേതിക സർവകലാശാല സ്ഥാപിച്ചതിലൂടെ നടപ്പിലായത് .  മികവിന്റ്റെ  കേന്ദ്രങ്ങളായ പതിനാറ്  കോളേജുകൾ  സ്വയംഭരണ കോളേജുകളായി മാറ്റിയതും  ഉമ്മൻചാണ്ടി സർക്കാരായിരുന്നു.   

  ദേശീയ ഗെയിംസ്  

                      2015 ൽ  ദേശീയ ഗെയിംസ്  കേരളത്തിൽ; വച്ച് നടത്തുവാൻ സാധിച്ചത് വലിയ വിജയമായിരുന്നു.  കായിക രംഗത്ത് വിവിധ ജില്ലകളിൽ അടിസ്ഥാന സൗകര്യങ്ങൾ ഉണ്ടാക്കുവാനും അന്തർ ദേശീയ നിലവാരമുള്ള കളിക്കളങ്ങൾ  പടുത്തുയർത്തുവാനും അത് നമ്മെ സഹായിച്ചു.  240  കോടി രൂപ ചെലവിൽ കാര്യവട്ടത്തു  നിർമിച്ച ഗ്രീൻ ഫീൽഡ് സ്റ്റേഡിയം , സിന്തറ്റിക് പ്രതലത്തോടുകൂടിയ തിരുവനന്തപുരത്തെ ടെന്നീസ് അക്കാദമി, കൊല്ലം ആശ്രാമത്തെ  ആസ്ട്രോ ടർഫ് ഹോക്കി സ്റ്റേഡിയം, കണ്ണൂർ മുണ്ടായതെ ഇൻഡോർ സ്റ്റേഡിയം, തൃശൂർ രാമപുരത്തെ  ഷൂട്ടിംഗ് റേഞ്ച്, തിരുവനന്തപുരം പാളയത്തെ  അന്താരാഷ്ട്ര നിലവാരമുള്ള സ്ക്വാഷ് കോർട്ട്, നെ ട്ടയത്തെ ഏറ്റവും വലിയ ഷൂട്ടിംഗ് റേഞ്ച്, തുടങ്ങി അന്താരാഷ്ട്ര നിലവാരമുള്ള നിരവധി കളികളങ്ങളാണ് കേരളത്തിൻറ്റെ  വിവിധ ഭാഗങ്ങളിൽ ദേശീയ ഗെയിംസുമായി ബന്ധപ്പെട്ടു  ഉയർന്നു വന്നത്.  ഇവ  ഇന്ന് വളർന്നു വരുന്ന കായിക പ്രതിഭകൾക്ക് അനുഗ്രഹമായി മാറിയിട്ടുണ്ട്. 

സർക്കാർ മേഖലയിൽ പുതിയ മെഡിക്കൽ കോളേജുകൾ 

          മനസ്സ് മുഴുവൻ പാവപ്പെട്ടവരോടുള്ള അനുകമ്പ നിറഞ്ഞു തുളുമ്പുന്ന ഉമ്മൻ ചാണ്ടിയെ ഏറ്റവും ആശങ്കാകുലൻ ആക്കുന്നത് ജനങ്ങളുടെ ആരോഗ്യ പ്രശ്നം ആണ്. കേരളത്തിൽ ഇതൊരു സാമൂഹിക പ്രശ്നം ആണെന്നും, ഒരു പരിധി കഴിഞ്ഞാൽ അത് സാമൂഹിക പിരിമുറുക്കം ആയി മാറും എന്നും, സംസ്ഥാനത്തിന്റ്റെ വികസനത്തിന് പ്രതിബന്ധമാകുമെന്നും അദ്ദേഹം മനസിലാക്കി. ഇതിനു പരിഹാരം ആയി ആരോഗ്യ രംഗത്ത് വലിയ മാറ്റങ്ങൾ കൊണ്ട് വരണമെന്ന് അദ്ദേഹം ആഗ്രഹിച്ചു. കാരുണ്യ, ശ്രുതി തരംഗം, സുകൃതം, ആരോഗ്യ കിരണം, അമൃത ആരോഗ്യം തുടങ്ങി നിരവധി പദ്ധതികൾക്കാണ് കഴിഞ്ഞ ഉമ്മൻ ചാണ്ടി സർക്കാർ രൂപം നൽകിയത്. അദ്ദേഹം നടത്തിയ ജന സമ്പർക്ക പരിപാടിയിൽ  പങ്കെടുത്തവർ   ഉൾപ്പടെ ഒട്ടേറെ പേർ മരുന്ന് വാങ്ങുവാൻ ഉള്ള സഹായത്തിനായി അദ്ദേഹത്തോട് അവശ്യ പെടാറുണ്ടായിരുന്നു. അതിൽ നിന്നാണ് പ്രാഥമിക ആരോഗ്യ കേന്ദ്രങ്ങൾ മുതൽ മെഡിക്കൽ കോളേജുകളിൽ വരെ ജനറിക് മെഡിസിൻ സൗജന്യം ആയി വിതരണം ചെയ്യുവാൻ ഉള്ള സംവിധാനം ഉണ്ടാക്കിയത്. കഴിഞ്ഞ UDF സർക്കാർ അധികാരത്തിൽ ഏറുമ്പോൾ, സംസ്ഥാനത്തു 5 സർക്കാർ മെഡിക്കൽ കോളേജുകളായിരുന്നു ഉണ്ടായിരുന്നത്. എല്ലാ ജില്ലകളിലും സർക്കാർ മെഡിക്കൽ കോളേജ് സ്ഥാപിക്കുക എന്നത് മുഖ്യ മന്ത്രി എന്ന നിലയിൽ അദ്ധേഹത്തിന്റെ ആഗ്രഹം ആയിരുന്നു. തിരുവനന്തപുരത്തും, ആലപ്പുഴയിലും , നിലവിൽ ഉള്ള സർക്കാർ മെഡിക്കൽ കോളേജുകൾക്കും പുറമെ പുതുതായി ഓരോ മെഡിക്കൽ കോളേജുകൾ ഉൾപ്പടെ പതിനാറു സർക്കാർ മെഡിക്കൽ കോളേജുകൾ സജ്ജമായി കഴിഞ്ഞാൽ, എല്ലാ ജില്ലാ കളിലെയും ജനങ്ങൾക്കു അതാത് ജില്ലകളിൽ തന്നെ വിദഗ്ധ ചികിത്സ ഉറപ്പാക്കുവാൻ സാധിക്കുമെന്നായിരുന്നു അദ്ധേഹത്തിന്റെ വിശ്വാസം. പിന്നീട് വന്ന പിണറായി സർക്കാർ, ഈ മെഡിക്കൽ കോളേജുകളിൽ ചിലതു വേണ്ടെന്നു വെച്ചു . കേരള സംസ്ഥാന രൂപകരണ ശേഷം ഇത്രയും സർക്കാർ മെഡിക്കൽ കോളേജുകൾ സ്ഥാപിക്കുവാൻ തീരുമാനിക്കുന്നത് ഒരു വലിയ റെക്കോർഡ് ആണ്. പശ്ചാത്തല വികസനത്തോടൊപ്പം പ്രാധാന്യം ഉള്ളതാണ് മനുഷ്യരുടെ ആരോഗ്യവും എന്ന കാഴ്ചപ്പാടിൽ ഊന്നി ഉള്ള ക്രാന്ത ദർശിത്വം ആണ് അദ്ദേഹത്തിന്റെ വികസന കാഴ്ചപ്പാടിൻറ്റെ  അന്തസത്ത.

മലയാളം ശ്രേഷ്‌ഠ ഭാഷയാകുന്നു 

മലയാള ഭാഷയെ പരിപോഷിപ്പിക്കാൻ മലയാള സർവ്വകലാശാലയെന്നത് കേരളീയരുടെ, വിശേഷിച്ചും,  സാഹിത്യകാരന്മാരുടെ  ചിരകാല അഭിലാഷമായിരുന്നു. 2012  ലെ കേരള  പിറവി ദിനത്തിൽ ഈ സർവകലാശാല മുഖ്യമന്ത്രി ഉമ്മൻ ചാണ്ടി ജനങ്ങൾക്കു സമർപ്പിച്ചു. തമിഴിനും, തെലുങ്കിനും, കര്ണാടകക്കും പിറകെ മലയാളത്തിന്  ശ്രേഷ്‌ഠ  ഭാഷ  പദവി ലഭ്യമാക്കാൻ അദ്ദേഹം കിണഞ്ഞു പരിശ്രമിച്ചു. ഒടുവിൽ  കേന്ദ്ര സർക്കാർ അതങ്ങീകരിച്ചത്  വലിയ നേട്ടമാണ്.  മലയാളം ഏക ഔദ്യോഗിക ഭാഷയാക്കി നിയമ നിർമാണവും  നടത്തി.

 2012 ൽ സംസ്ഥാന  ഗവർണറായിരുന്ന     എം ഒ  എച്   ഫാറൂഖ്     അസുഖ ബാധിതനായി ചെന്നൈ ആശുപത്രിയിൽ കിടന്നപ്പോൾ, അദ്ദേഹത്തിനെ പോയി കാണണമെന്ന്    ഉമ്മൻ ചാണ്ടിസാർ  ആഗ്രഹിച്ചു. എന്നാൽ മുല്ല പെരിയാർ പ്രശ്നവുമായി ബന്ധപ്പെട്ടു  കേരളത്തിനെതിരെ തമിഴ് നാട്ടിൽ ശക്തമായ  പ്രക്ഷോഭം നടക്കുന്ന സമയമായിരുന്നു.  ആ ഒരു സാഹചര്യത്തിൽ   അദ്ദേഹം ചെന്നൈയിലേക്ക്  യാത്ര ചെയ്യുന്നതിന്  ഇന്റലിജൻസ് വിഭാഗം എതിരായിരുന്നു. അതിനാൽ ചെന്നൈയിലെ  ആശുപത്രിയിൽ പോയി ഗവർണറെ കണ്ടു സുഖാന്വേഷണം നടത്താൻ എന്നെയാണ്    അദ്ദേഹം നിയോഗിച്ചത്. ഞാൻ ആശുപതിയിൽ പോയി മുഖ്യമന്ത്രിയുടെ സ്നേഹാന്വേഷണങ്ങൾ  അദ്ദേഹത്തെ നേരിൽ കണ്ടു അറിയിച്ചു. അങ്ങിനെ ഒരു സൗമനസ്യം കാട്ടിയതിന് ഗവർണർ പ്രത്യേകം നന്ദിയും പറഞ്ഞു. 2012  ജനുവരി 26 നായിരുന്നു അദ്ദേഹം ആശുപത്രിയിൽ വച്ച് അന്തരിച്ചത്.

           

അഡ്വ.പി .എസ് .ശ്രീകുമാർ,

(ഉമ്മൻചാണ്ടി മുഖ്യമന്ത്രിയായിരുന്നപ്പോൾ  പ്രൈവറ്റ് സെക്രട്ടറിയായിരുന്നു}

9847173177

1 .

       

         കൊച്ചിയിലെ  ജലമെട്രോയും  പിണറായി   സർക്കാരിന്റെ  അവകാശവാദവും 

അഡ്വ. പി.എസ് .ശ്രീകുമാർ 

 

കഴിഞ്ഞ ഒരു വ്യാഴവട്ടകാലമായി കൊച്ചി നഗരവാസികൾ ആഗ്രഹിച്ചിരുന്ന ഒരു സംയോജിത ജല ഗതാഗത സംരംഭമാണ്  2023  ഏപ്രിൽ 25 നു പ്രധാനമന്ത്രി നരേന്ദ്രമോദി തിരുവനന്തപുരത്തു  ഉദ്‌ഘാടനം ചെയ്ത കൊച്ചി വാട്ടർ മെട്രോ. ഇത്  ഇടതുപക്ഷ സർക്കാരിന്റെ  സ്വപ്ന പദ്ധതിയെന്നാണ്  മുഖ്യമന്ത്രി  പിണറായി വിജയൻ ഉദ്‌ഘാടന ചടങ്ങിൽ  അവകാശപ്പെട്ടത്. കൊച്ചി  ജല മെട്രോയുടെ പിറകിലുള്ള ചരിത്രം മറച്ചുവച്ചാണ് പിണറായിയും, പിന്നീട് വ്യവസായ മന്ത്രി രാജീവും ഉൾപ്പെടെയുള്ളവർ ഈ   വ്യാജ അവകാശം ഉന്നയിക്കുന്നത്.  

കൊച്ചി   മെട്രോ   റെയിലിന്     അനുമതി നൽകിയപ്പോൾ, അന്ന് കേന്ദ്രം ഭരിച്ച മൻമോഹൻ സിംഗ് സർക്കാർ  ഒരു നിബന്ധനകൂടി വച്ചിരുന്നു. കൊച്ചി നഗരത്തിലെ  റോഡ്  ഗതാഗതത്തിലെ  തിരക്ക് ഒഴിവാക്കുവാൻ  മെട്രോ റയലിന് പുറമേ  ജല ഗതാഗതം ഉൾപ്പെടെയുള്ള സംയോജിത ഗതാഗതത്തിന്  രൂപം നൽകണമെന്നതായിരുന്നു ആ നിബന്ധന.  അതിൻറ്റെ അടിസ്ഥാനത്തിൽ   മുഖ്യമന്ത്രി ഉമ്മൻ ചാണ്ടി നേതൃത്വം നൽകിയ മന്ത്രിസഭ, അന്നത്തെ കൊച്ചി മെട്രോ മാനേജിങ് ഡയറക്ടർ ആയിരുന്ന  ഏലിയാസ്‌  ജോർജ്  ഉൾപ്പെടെയുള്ള  സാങ്കേതിക വിദഗ്ധരുമായി  ചർച്ച ചെയ്താണ്  സമഗ്രമായ ഒരു ഗതാഗത നയം കൊച്ചിനഗരത്തിനായി  രൂപം കൊടുത്ത്ത്. റോഡ് സൗകര്യങ്ങളും, വാഹനങ്ങളുടെ എണ്ണവും വർധിച്ചതോടെ വിവിധ ദ്വീപുകളിൽ താമസിക്കുന്നവും, കനാലുകളുടെ തീരത്തു താമസിക്കുന്നവുമെല്ലാം, മുൻകാലങ്ങളിൽ ആശ്രയിച്ചിരുന്ന  ജലഗതാഗതത്തെ അവഗണിച്ചിരിക്കുകയായിരുന്നു. ഇതിനൊരു പരിഹാരമെന്ന നിലയിൽ, ആധുനികവും  സുരക്ഷിതവുമായ  ബോട്ടുകൾ, ബോട്ട് ജെട്ടികൾ, ദ്വീപുകളൾക്കുള്ളിലും, വിവിധ ജെട്ടികളിലേക്കുമുള്ള  റോഡുകൾ,  തെരുവ് വിളക്കുകൾ   എന്നിവ  എല്ലാം ഉൾപ്പെടുത്തിയുള്ള സമഗ്രമായ ജലഗതാഗത പദ്ധതിയാണ് തയ്യാറാക്കി  2014 നവംബർ മാസത്തിൽ കേന്ദ്ര സർക്കാരിന് നൽകിയത്.

 അങ്ങിനെ, കേന്ദ്ര സർക്കാരിന്റെകൂടി  അംഗീകാരത്തോടെയാണ്, 2015 ൽ   ഉമ്മൻചാണ്ടി സർക്കാർ   ഒരു സംയോജിത ജല ഗതാഗത സംവിധാനം  വിഭാവനം ചെയ്തത് . 19-11-2015ൽ സ.ഉ.(എം.എസ് ) 73/2015 /ഗതാഗതം  എന്ന ഉത്തരവ് പ്രകാരമാണ്  682 .01  കോടി ചെലവ് പ്രതീക്ഷിക്കുന്ന  ഈ പദ്ധതിക്ക്  സർക്കാർ അംഗീകാരം നൽകി.  അതിനു മുമ്പ് തന്നെ  അന്നത്തെ കെ.എം.ആർ.എൽ. മാനേജിങ് ഡയറക്ടർ ആയിരുന്ന എലിയാസ് ജോർജിനെ  ഇതിനു ധനസഹായം നൽകുന്ന ഏജൻസിയെ കണ്ടുപിടിക്കാൻ ചുമതല ഏൽപ്പിച്ചു.   ജർമൻ ധനകാര്യ സ്ഥാപനമായ Kfu (Kreditanstalt  fur Wiederauthau ) എന്ന സ്ഥാപനവുമായി ചർച്ചനടത്തി  ധനസഹായം ഉറപ്പാക്കിയത് എലിയാസ് ജോർജിൻറ്റെ  നേതൃത്വത്തിലുള്ള ഉദ്യോഗസ്ഥ സംഘമായിരുന്നു.  ഇന്ത്യയിലെ  മാത്രമല്ലാ  ഏഷ്യയിലെ തന്നെ ആദ്യത്തെ  ജല   മെട്രോ  എന്ന രീതിയിലാണ്  ഇതിനു രൂപം നൽകിയത് .

    

കൊച്ചിയിലെ പത്തു ദ്വീപുകളെ ആധുനിക മെട്രോ  ജലഗതാഗത സംവിധാനവുമായി ബന്ധപ്പെടുത്തികൊണ്ടു  വേഗതയിൽ  യാത്ര സൗകര്യം ഒരുക്കുകയായിരുന്നു പ്രധാന  ഉദ്ദേശം.  അന്ന് നിലവിലുണ്ടായിരുന്ന,  സംസ്ഥാന ജലഗതാഗത വകുപ്പിന്റെ  ജലഗതാഗത സംവിധാനം, ആറു പഴഞ്ചനും, വളരെ വേഗതകുറഞ്ഞതുമായിരുന്നു. മാത്രമല്ലാ ,  ആധുനിക സൗകര്യങ്ങളൊന്നും  അതിലില്ലായിരുന്നു. അതുകൊണ്ട്  കൊച്ചി നഗരത്തിലെ ദ്വീപു നിവാസികൾ പോലും റോഡ് ഗതാഗതത്തെ  ആശ്രയിക്കേണ്ടിവരുന്നു.  കൊച്ചിയിലെ റോഡുകളിലെ  വാഹനങ്ങളുടെ പെരുപ്പവും,  തിരക്കും, ഗതാഗത കുരുക്കുകളും    രൂക്ഷമാണ്.  റോഡുകളുടെ വീതിയില്ലായ്മ  തിരക്കിന്റെ രൂക്ഷത വർധിപ്പിക്കുകയും ചെയ്യുന്നു . ദ്വീപു നിവാസികൾ റോഡ് ഗതാഗതം ഒഴിവാക്കി ജല ഗതാഗതത്തെ ആശ്രയിക്കുകയാണെങ്കിൽ  അവരുടെ യാത്രാ  ക്ലേശങ്ങൾ   ഒഴിവാക്കുന്നതിനൊപ്പം റോഡിലെ തിരക്ക് അല്പമെങ്കിലും കുറക്കുവാനും  സാധിക്കും എന്ന വിശ്വാസത്തിലാണ്  മെട്രോ റയിലിനൊപ്പം , വാട്ടർ മെട്രോ എന്ന സംയോജിത ഗതാഗത സംവിധാനത്തിന് വിശദമായ പ്രൊജക്റ്റ് റിപ്പോർട്ട്  തയ്യാറാക്കാൻ  അർബൻ  മാസ്സ് ട്രാൻസിറ്റ് കമ്പനിയെ   ഏൽപ്പിച്ചത്. ജലമേട്രോ,  മൂന്നു ഘട്ടങ്ങളായി പൂർത്തീകരിക്കാനാണ് വിഭാവനം ചെയ്തത്.  പദ്ധതിയുടെ ആദ്യഘട്ടമായാണ് ഹൈകോർട്-വൈപ്പിൻ ടെര്മിനലുകളിൽ നിന്നും, വൈറ്റില-കാക്കനാട് ടെർമിനലിൽ നിന്നുമുള്ള   വാട്ടർ മെട്രോ  സർവീസുകൾ. ഒന്നാം ഘട്ടത്തിന് 214 കോടി രൂപയും, രണ്ടാം ഘട്ടത്തിന് 156 കോടി രൂപയും, മൂന്നാം ഘട്ടത്തിന്  312 കോടി രൂപയുമാണ്  ചെലവ് പ്രതീക്ഷിച്ചത്‌.  ആദ്യ ഘട്ടത്തിൽ 35000  യാത്രികർക്കും,പിന്നീട്  90000  യാത്രികർക്കും  പദ്ധതിയുടെ പ്രയോജനം ലഭിക്കുമെന്നാണ് പ്രൊജക്റ്റ് റിപ്പോർട്ടിൽ പറഞ്ഞിട്ടുള്ളത്. പദ്ധതിയുടെ മൂന്നു ഘട്ടങ്ങളും പൂർത്തിയാകുമ്പോൾ പത്തു ദ്വീപുകളിലായി 38  ടെർമിനലുകളെ  ബന്ധിപ്പിച്ചുകൊണ്ട് 78  വാട്ടർ മെട്രോ സർവിസുകൾ നടത്തുവാൻ സാധിക്കും. പദ്ധതി നടത്തിപ്പിൽ കാലതാമസം ഉണ്ടായതോടെ പദ്ധതി ചെലവ് 1136.83 കോടിയായി വർധിച്ചു. അതിൽ 908.76 കോടി രൂപ ജർമൻ ഫണ്ടിംഗ് ഏജൻസിയുടെ ധനസഹായമാണ്.

വാട്ടർ മെട്രോക്ക് വേണ്ട ബോട്ടുകൾ നിർമിക്കുന്നത് കൊച്ചി കപ്പൽ നിർമ്മാണശാലയാണ് .  ഭാരം കുറവുള്ള അലൂമിനിയവും, ആധുനിക സാങ്കേതികവിദ്യകളും, അതുപോലെ നൂതനമായ ഗതിനിയന്ത്രണ-ആശയവിനിമയ സംവിധാനങ്ങളും ഉപയോഗിച്ചാണ് ബോട്ടുകൾ നിർമിച്ചിട്ടുള്ളത്.  ശീതികരിച്ച ഈ  ഇലക്ട്രിക്ക്ബോട്ടുകളിൽ  സുരക്ഷിതമായി യാത്രചെയ്യുവാൻ സാധിക്കും. ഡീസലോ,മറ്റു പെട്രോളിയം ഇന്ധനങ്ങളോ ഉപയോഗിക്കാത്തതിനാൽ, മലിനീകരണം തീരെ കുറവാണു. പ്രകൃതി സൗഹൃദമായാണ്  മെട്രോക്ക് ആവശ്യമായ ബോട്ടുകൾ ഡിസൈൻ ചെയ്തിട്ടുള്ളത്.

 നഗരത്തിലെ തിരക്ക് കുറക്കുന്നതിനൊപ്പം, കാർബൺ ഫുട്പ്രിൻറ്  കുറക്കാനും ഇത് സഹായിക്കും. പദ്ധതിയുടെ മൂന്നു ഘട്ടങ്ങളും പൂർത്തിയാകുന്നതോടെ, കാർബൺ ബഹിർഗമനത്തിൽ 44000  ടണ്ണിൻറ്റെ  കുറവ് ഉണ്ടാകും.  ഉമ്മൻ‌ചാണ്ടി സർക്കാർ  വിഭാവനം ചെയ്ത ഈ പദ്ധതി  അനാവശ്യമായ കാലതാമസം വരുത്തിയതിലൂടെ  അധിക ചെലവ്  വരുത്തിയതാണ് പിണറായി  സർക്കാരിന്റെ  സംഭാവന . യു ഡി എഫ് സർക്കാരിന്റെ സ്വപ്ന  പദ്ധതിയെന്ന നിലയിൽ  ഈ പദ്ധതിയുടെ ഉദ്‌ഘാടന ചടങ്ങിന്   യു ഡി എഫിനെ പ്രതിനിധീകരിച്ച്  പ്രതിപക്ഷ നേതാവിനെ ഉദ്‌ഘാടന ചടങ്ങിൽ പങ്കെടുപ്പിക്കേണ്ടതായിരുന്നു.

അഡ്വ. പി.എസ് .ശ്രീകുമാർ 

9847173177 

Sudan plunged into civil war

Adv. PS Sreekumar

The civil war that started in Sudan on April 15 between the army (SAF) and the paramilitary (RSF) continues unabated. Not only did the clashes continue despite a three-day ceasefire brokered by Saudi Arabia and the UAE on the occasion of Eid, but firing and explosions continued regularly in many parts of the country. Both the army chiefs have issued separate statements saying that the clash between the two army units has been stopped for the time being. Both forces have stated that the ceasefire has been announced to allow citizens to buy essentials, escape to safe places and evacuate their citizens to foreign countries. Taking advantage of this opportunity, countries including India are repatriating their citizens to their respective countries. The central government has informed that all the 3500 odd Indians in Sudan have been brought back. So far, 512 people have been killed, over 4,200 people have been injured and nearly 1,00,000 people have lost their homes and fled to neighboring countries as refugees, according to the figures released by organizations including Human Rights Watch.

  In the shadow of totalitarianism

From the end of the century until 1956, Sudan was under the joint administration of Britain and Egypt. Sudan became an independent nation on January 1, 1956 after gaining independence from Britain. Sudan is internationally recognized for its frequent military coups. The struggle for power between the Muslim-majority North Sudan and the Christian-tribal-dominated South Sudan has always been great. For 30 years from 1989 to 2019, the Republic of Sudan was under the military rule led by Colonel Omar Al Bashir. Omar Bashir gained notoriety for suppressing dissenting voices, committing human rights violations, persecuting minorities, and supporting terrorist activities internationally. The main tribes of Darfri in South Sudan fought together with other people for the liberation of South Sudan. As part of that, they attacked the military base in Darfur in 2003. In the ensuing war, the army led by Colonel Basheer massacred over three lakh tribal people. On that day, more than one million people fled from the land of riots to neighboring countries. After years of armed insurgency, South Sudan became an independent country in 2011.

Those who stood together were separated

General Abdel Fattah al-Burhan, head of the SAF (Sudanese Armed Force), and Mohammed Hamdan Dagalo, head of the paramilitary RSF (Rapid Support Force), joined forces with Bashir to ruthlessly suppress dissenting voices against his regime. A popular uprising against Bashir's authoritarian and anti-people policies that began in 2018 ended with his ouster. Bashir was ousted in April 2019 along with Burhan and Dagalo, who were in the top positions of the military units under the cover of popular uprising. According to the agreement reached between the protesters and the army, it was decided to share power. The representatives of both groups formed a committee called the Sovereign Council. According to the agreement, General Burhan, the head of the Sovereign Council, and Abdullah Hamdok, the leader of the agitators, became the prime minister. The agreement was to hold elections in a democratic manner in 2023 and give the power completely to the people.

In October 2021, Prime Minister Hamdock was ousted and Burhan took over the government, contrary to the agreement made with the leaders of the popular agitation. Dagola was put to second and Burhan held on. After discussing with the leaders of the popular agitators again, it was agreed that elections could be held in July 2023. Another condition of the agreement was to merge the RSF into the army and form a unified army within two years. . The final agreement in this regard is already scheduled to be signed in April. But Dagonte's opinion was that the merger should not be done immediately. Dagola could not mentally adjust to this condition. Because they are the ones who find out the financial source of the RSF, of which he is the head. Their inexhaustible pot is the gold mines of Darfur. The rift between Burhan and Dagola and the tug of war for power and wealth led to a civil war.

Burhan has Egypt and Jordan to help him. Dagon is also strongly supported by the Wagner Group, a Russian mercenary force. Eritrea and a section of Libya are behind the scenes with Dagon. No matter who wins this race for power, it is the starving poor common people of Sudan who will suffer and suffer hell. The people of Sudan are without food, medicine and Fleeing from the war zone. The time has come for the African Union, the United Nations or the Arab countries including Saudi Arabia and the UAE to come forward to negotiate with the two sections of the army and create a peaceful atmosphere.

PS, Sreekumar

9847173177

A Sudanese military camp in Darfuri region was attacked and caused heavy damage. With that, on Bashir's instructions, the Sudanese army launched a mass offensive to exterminate the Darfuri tribesmen. Human rights organizations have revealed that about three lakh to four lakh people were killed.

 

                   നയതന്ത്ര  രംഗത്ത്  സമാധാന ദൂതുമായി  ചൈന 

ചിരകാല വൈരികളായിരുന്ന  സൗദി അറേബ്യയും  ഇറാനും,  ചൈനയുടെ മധ്യസ്ഥതയിൽ,   നയതന്ത്ര ബന്ധങ്ങൾ   പുനസ്ഥാപിക്കുവാൻ  കരാറിൽ ഒപ്പുവച്ച വാർത്ത   തെല്ല്  ആശ്ചര്യത്തോടെയാണ്  അന്തർദേശിയ നയതന്ത്ര സമൂഹം  ശ്രവിച്ചത് .   ഏഴു വർഷങ്ങൾക്ക്  മുമ്പ്     നയതന്ത്ര ബന്ധങ്ങൾ  അവസാനിപ്പിച്ച്, പരസ്പരം പ്രോക്സി യുദ്ധം നടത്തിയ  ഗൾഫ് മേഖലയിലെ  രണ്ട്  പ്രമുഖ രാജ്യങ്ങൾ സമാധാനത്തിൻറ്റെ  പാതയിലൂടെ സഞ്ചരിക്കാൻ തീരുമാനിച്ചത്  മേഖലയിലെ, ഇസ്രായേൽ ഒഴികെ , എല്ലാ രാജ്യങ്ങളും  സ്വാഗതം ചെയ്തിട്ടുണ്ട് .  ചൈനയുടെ വിദേശകാര്യ വിഭാഗത്തിൻറ്റെ  തലവനായ  വാങ് യിയുടെ  നേതൃത്വത്തിലാണ്  സൗദിയുടെയും ഇറാൻറ്റെയും  സുരക്ഷാ  ഉപദേശകർ,   കഴിഞ്ഞ  കുറെ നാളുകളായി നടത്തിവന്ന രഹസ്യ ചർച്ചകൾക്കൊടുവിൽ,     മാർച്ച്  10 ന്  ബെയ്‌ജിങ്ങിൽ വച്ച് അന്തിമ കരാറിൽ ഒപ്പുവച്ചത്.   സൗദി അറേബ്യയുടെ സുരക്ഷാ ഉപദേഷ്‌ടാവും  മന്ത്രിയുമായ മുസാദ്  ബിൻ മുഹമ്മദ് അൽ ഐബാനും, ഇറാനിലെ ദേശിയ സുരക്ഷാ സമിതിയുടെ സെക്രട്ടറി അലി ശംഖാനിയുമാണ് 

 ഇരു രാജ്യങ്ങളെയും പ്രതിനിധീകരിച്ചു കരാറിൽ ഒപ്പുവച്ചത്.  ആ   ദിവസത്തിന് മറ്റൊരു പ്രത്യേകതകൂടിയുണ്ട്.  അന്നാണ്  ചൈനയുടെ പ്രസിഡന്റ്  ഷി ജിങ് പിംഗ് മൂന്നാമതും   പ്രസിഡന്റ്  സ്ഥാനത്തേക്ക് തെരഞ്ഞെടുക്കപ്പെട്ടത്.

അമേരിക്കയുടെ സാന്നിധ്യം ഇല്ലാത്ത കരാർ 

ഈ കരാർ അനുസരിച്ചു് നയതന്ത്രബന്ധം പുനഃസ്ഥാപിക്കുന്നതിനു പുറമേ  ഇരു രാജ്യങ്ങളും  പരസ്പരം  പരമാധികാരത്തെ  മാനിക്കുമെന്നും,  മറു രാജ്യത്തിൻറ്റെ ആഭ്യന്തര കാര്യങ്ങളിൽ  ഇടപെടുകയില്ലെന്നും ഉറപ്പുവരുത്തും. ഇതിനു പുറമേ, മുമ്പ് ഒപ്പുവച്ചതും പിന്നീട്  ചവറ്റുകുട്ടയിൽ എറിയുകയും ചെയ്ത 1998 ലെ സാമ്പത്തിക-സാങ്കേതിക- ശാസ്ത്ര -സാംസ്‌കാരിക ബന്ധങ്ങൾ ക്കായുള്ള  കരാറും , 2001 ലെ സുരക്ഷാ-സഹകരണ കരാറും  പുനരുജ്ജീവിപ്പിക്കുവാനും  തീരുമാനിച്ചു.  ഈ കരാറിൻറ്റെ  ഒരു സവിശേഷത  അമേരിക്കയുടെ സാന്നിധ്യമില്ലാതെ,  ഗൾഫ് മേഖലയിൽ,    രണ്ടു രാജ്യങ്ങൾ  സമാധാന ശ്രമങ്ങളുടെ ഫലമായി  കരാറിൽ ഒപ്പുവച്ചു എന്നതാണ്.  ഇറാഖിലെയും, അഫ്ഘാനിസ്ഥാനിലെയും സൈനിക പരാജയങ്ങളുടെ  പശ്ചാത്തലത്തിൽ, മധ്യേഷ്യയിൽ അമേരിക്കയുടെ വിശ്വാസ്യത  വളരെയധികം ഇടിഞ്ഞു.  പുറമേ,  ലോക പൊലീസിങ്ങിൽ നിന്നും  മാറിനിൽക്കുവാനുള്ള അമേരിക്കയുടെ തീരുമാനവും   അന്തർദേശിയ കാര്യങ്ങളിൽ ഒരു വൻശക്തിയുടെ  സാന്നിധ്യം  ആവശ്യമാക്കിയിരുന്നു.  സോവിയറ്റ് യൂണിയൻറ്റെ  തകർച്ചയും ഈ രംഗത്ത് വലിയ വിടവാണ് സൃഷ്ടിച്ചത്.   ഈ അവസരമാണ്ചൈന ബുദ്ധിപൂർവം കൈകാര്യം ചെയ്തത്.  

അറാബ്  മേഖലയിലെ ഏറ്റവും വലിയ രാജ്യങ്ങളാണ് സൗദി അറേബ്യയും , ഇറാനും. സൗദി,  രാജഭരണത്തിന്റെ കീഴിലാണെങ്കിൽ, ഇറാൻ  യാഥാസ്ഥികരായ തീവ്ര ഇസ്ലാമിസ്റ്റുകൾ നേതൃത്വം നൽകുന്ന ഇസ്ലാമിക റിപ്പബ്ലിക്ക് ആണ്.  1979 വരെ ഇരു രാജ്യങ്ങൾക്കിടയിൽ  കാര്യമായ അഭിപ്രായ വ്യത്യാസങ്ങൾ ഇല്ലായിരുന്നു.  1979 ൽ ഷാ മുഹമ്മദ് റിസ പഹ്ലവിയുടെ നേതൃത്വത്തിലുള്ള രാജ ഭരണത്തെ അട്ടിമറിച്ചു  ഇസ്ലാമിക തീവ്രവാദികൾ അധികാരം പിടിച്ചെടുത്തതോടെയാണ്  ഇരു രാജ്യങ്ങളും തമ്മിലുള്ള അഭിപ്രായ ഭിന്നതകൾ പുറത്തുവന്നത്.  സിറിയയിലും, യമനിലും നടന്ന യുദ്ധങ്ങളിൽ സൗദിയും ഇറാനും  രണ്ടു വശങ്ങളിലായി അണിനിരന്നു പ്രോക്സി യുദ്ധം ചെയ്യുകയായിരുന്നു. സൗദി രാജഭരണത്തിനു, സുരക്ഷാ സേനക്കുമെതിരെ വിദേശ ശക്തികളുടെ കരങ്ങളായി  പ്രവർത്തിച്ചു അട്ടിമറി ക്ക്  ശ്രമിച്ചു എന്ന കുറ്റം ചുമത്തിയാണ് ഷെയ്ഖ് നിമാർ അൽ നിമാർ എന്ന ഷിയാ പുരോഹിതനെ  സൗദി അറേബ്യ 2016  ജനുവരി 2 ന്   വധിച്ചത്. ഇതിൻറ്റെ   തിരിച്ചടിയെന്നോണം ഇറാൻറ്റെ  തലസ്ഥാനത്തെ സൗദി എംബസിയും, മാഷാദ് നഗരത്തിലെ സൗദി കോൺസുലേറ്റും  ഷിയാ ജനക്കൂട്ടം ആക്രമിച്ചു നശിപ്പിച്ചു.  അതിനുശേഷം ഇരു രാജ്യങ്ങളും തമ്മിൽ കഴിഞ്ഞ ഏഴ്  വര്ഷങ്ങളായി നയതന്ത്ര ബന്ധം ഇല്ലാതിരിക്കുകയായിരുന്നു.  

ചൈനയുടെ താല്പര്യം എന്ത്?

ലോകത്തെ രണ്ടാമത്തെ  സൈനിക-സാമ്പത്തിക  ശക്തിയായ  ചൈനയുമായുള്ള ബന്ധം ഊർജം, വ്യവസായികം, സാങ്കേതികം, വാണിജ്യം, മുതൽമുടക്ക് തുടങ്ങി വൈവിധ്യമാർന്ന നിരവധി രംഗങ്ങളിൽ  പ്രയോജനപ്പെടുത്താം  എന്ന് രാജ്യങ്ങൾ കരുതുന്നു. മാത്രമല്ലാ,  ലോകത്തെ ഏറ്റവും വലിയ ഊർജ  ഉപഭോക്താവാണ്  ചൈന. കുറഞ്ഞവിലയ്ക്ക്  ഗൾഫ് മേഖലയിൽ നിന്നും പെട്രോളിയം ഉത്പന്നങ്ങൾ ലഭിക്കുന്നത് ചൈനയുടെ സാമ്പത്വ്യവസ്ഥയെ ശക്തിപ്പെടുത്താൻ  സഹായിക്കും എന്നതിൽ സംശയമില്ല.  കോവിദിന്റെയും, യുക്രൈൻ  യുദ്ധത്തിന്റെയും സാഹചര്യത്തിൽ  നിന്നും  ലോക രാജ്യങ്ങൾ മോചിതരാകുമ്പോൾ ,  ബെൽറ്റ് ആൻഡ് റോഡ് പദ്ധതികളിലൂടെ  മദ്ധ്യേഷ്യൻ  രാജ്യങ്ങളിൽ കടന്നുകയറാമെന്നും ചൈന കരുതുന്നുണ്ടാവാം.  യഥാർത്ഥ  ശക്തി  മറച്ചുപിടിച്ചിരുന്ന പഴയ  ചൈന അല്ല ഇന്നുള്ളത്.   തങ്ങളുടെ ശക്തി മുഴുവൻ പ്രദർശിപ്പിക്കാനും, പ്രകടിപ്പിക്കാനും മടിയില്ലാത്ത  ചൈനയാണ് ഷി ജിങ് പിങ്ങിൻറ്റെ  നേതൃത്വത്തിലുള്ള  ആധുനിക ചൈന.

യുക്രൈൻ  യുദ്ധവിരാമം അകലെയോ?

സാമ്പത്തിക രംഗത്തും, സൈനിക രംഗത്തും വൻശക്തിയായി ഉയർന്ന ചൈന, ഇത്രയും നാൾ  അന്താരാഷ്ട്ര നയതന്ത്ര  രംഗത്ത് നിന്നും മാറി നിൽക്കുകയായിരുന്നു. അതിനൊരു മാറ്റം കുറിച്ചുകൊണ്ടാണ്  സൗദി അറേബ്യയുടേയും  ഇറാൻറ്റെയും  ഇടയിൽ സമാധാന ദൂതുമായി  എത്തിയത്.അവരുടെ ആദ്യ ചുവടു വെപ്പ് വാൻ വിജയമായി മാറി.  ഇതിൽ നിന്നും പ്രചോദനം ഉൾക്കൊണ്ടുകൊണ്ടാണ്   റഷ്യ-യുക്രൈൻ  യുദ്ധത്തിന് വിരാമമിടാനുള്ള  പദ്ധതി തയ്യാറാക്കിയത് .  ഈ ലക്ഷ്യത്തോടെയാണ് ഷി ജിങ് പിംഗ് മാർച്ച് 20 ന്  മോസ്‌കോയിൽ നേരിട്ടെത്തി വ്ലാദിമിർ പുത്തിനുമായി  ചർച്ച നടത്തിയത്.  എന്നാൽ  തങ്ങളുടെ മണ്ണിൽ നിന്നും റഷ്യ പിന്മാറാതെ ഒരു ഒത്തുതീർപ്പിനും തയ്യാറല്ലെന്ന യുക്രൈൻ  പ്രസിഡന്റ് വോളോദിമിർ  സെലിൻസ്കിയുടെയും, അമേരിക്ക ഉൾപ്പെടെയുള്ള പാശ്ചാത്യ ശക്തികളുടെയും  നിലപാട്   ചൈനയുടെ സമാധാന ദൂതിന്  മുമ്പിൽ  തടസ്സം സൃഷ്ടിച്ചിരിക്കുകയാണ്.  എടുത്ത നിലപാടിൽ നിന്നും  പിൻവാങ്ങാൻ   പുത്തിനും   സാധിക്കുകയില്ല.   റഷ്യ-യുക്രൈൻ  യുദ്ധത്തിന് വിരാമം ഉണ്ടാക്കുവാൻ സാധിച്ചില്ലെങ്കിലും,  അമേരിക്കക്കു വെല്ലുവിളി ഉയർത്തികൊണ്ട്  ഒരു നയതന്ത്ര ശക്തി ആകുവാൻ  ചൈന തയ്യാറായിക്കഴിഞ്ഞു   എന്ന സന്ദേശം  നൽകുവാൻ  അവർക്കു സാധിച്ചു.

അഡ്വ.പി.എസ്‌ .ശ്രീകുമാർ 

9847173177 

                 യുക്രൈൻ  യുദ്ധം ഉയർത്തുന്ന പാരിസ്ഥിതിക പ്രശ്നങ്ങൾ 

അഡ്വ. പി.എസ് . ശ്രീകുമാർ

ഡോ .കെ.ആർ.ജ്യോതികുമാരി 

 യുക്രൈനെതിരെ  റഷ്യ ഏകപക്ഷീയമായ യുദ്ധം ആരംഭിച്ചിട്ട്  ഒരു വർഷവും രണ്ടു മാസവും പിന്നിട്ടു കഴിഞ്ഞു.   ഇരു  പക്ഷത്തും  ഗുരുതരമായ നാശനഷ്ടങ്ങളാണ്    ഉണ്ടായിട്ടുള്ളത് .  ഐക്യ രാഷ്ട്ര സഭയുടെ മനുഷ്യാവകാശ കമ്മീഷണറുടെ ഓഫീസ്  പുറത്തുവിട്ട കണക്കുകൾ പ്രകാരം  രണ്ടു ലക്ഷത്തിനും  രണ്ടര ലക്ഷത്തിനും ഇടയിൽ റഷ്യൻ സൈനികരും,   റഷ്യയുടെ  സഹായത്തിന്  എത്തിയിട്ടുള്ള   സ്വകാര്യ സേനയായ  വാഗ്‌നർ  ഗ്രൂപ്പിലെ  അംഗങ്ങളും കൊല്ലപ്പെടുകയോ, പരുക്കുപറ്റുകയോ  അല്ലെങ്കിൽ  കാണാതാവുകയോ ചെയ്തിട്ടുണ്ട്. യുക്രൈൻ  സർക്കാർ പുറത്തുവിട്ട കണക്കുകൾ പ്രകാരം , സർക്കാരിൻറ്റെ  നിയന്ത്രണത്തിലുള്ള പ്രദേശങ്ങളിൽ 17820  പേര് കൊല്ലപ്പെടുകയോ, ഗുരുതര പരുക്കേൽക്കുകയോ കാണാതാകുകയോ ചെയ്തിട്ടുണ്ട്.   യഥാർത്ഥ കണക്കു ഇതൊന്നുമല്ല.   യുക്രൈൻ  സൈനികരും,  സാധാരണ പൗരന്മാരും  ഉൾപ്പെടെ  രണ്ടുലക്ഷത്തിലേറെപ്പേരാണ്  യുദ്ധത്തിൻറ്റെ  ഇരകളായി  മാറിയത് എന്നാണ് യൂറോപ്യൻ രാജ്യങ്ങളുടെ വിലയിരുത്തൽ.  ഭൗതികമായ നാശനഷ്ടങ്ങൾ ഏറെ ഉണ്ടായതു യുക്രൈൻ    പക്ഷത്താണ്. ഏകദേശം  ഒന്നര  കോടിയോളം  യുക്രൈൻ  പൗരന്മാരാണ്  കയറിക്കിടക്കാനൊരിടമില്ലാതെ അഭയാർഥികളായി  അയൽ രാജ്യങ്ങളിലേക്ക്   പലായനം ചെയ്തത്..   ,

യുക്രൈനിലെ  അടിസ്ഥാന സൗകര്യങ്ങളിൽ സിംഹഭാഗവും  റഷ്യൻ സൈന്യം തകർത്തു. റോഡുകൾ, പാലങ്ങൾ, ഷോപ്പിംഗ് കേന്ദ്രങ്ങൾ, എയർപോർട്ടുകൾ  , ഫാക്ടറികൾ, രണ്ടായിരത്തിൽ പരം സ്കൂളുകൾ, ആശുപത്രികൾ, ഒരുലക്ഷത്തിൽ  പരം സ്വകാര്യ വസതികൾ, പതിനയ്യായിരത്തിൽ പരം അപ്പാർട്മമെൻറ്റുകൾ , വാണിജ്യകേന്ദ്രങ്ങൾ   എന്നിവയെല്ലാം റഷ്യൻ ആക്രമണത്തിൽ  നാമാവശേഷമായി.  യുക്രൈന്റ്റെയും റഷ്യയുടേയും   എത്ര സൈനിക വാഹനങ്ങളും, ഉപകരണങ്ങളും, ആയുധങ്ങളും നഷ്ടപ്പെട്ടു എന്നത് സംബന്ധിച്ച് വ്യക്തതയില്ല. എന്നാൽ റഷ്യയുടെ നാലായിരത്തോളം സൈനിക വാഹനങ്ങളും, ദിവസേന പതിനായിരത്തില്പരം ആർട്ടിലറി ഷെല്ലുകളും  നശിപ്പിക്കപ്പെടുന്നുണ്ട്. പ്രാഥമിക കണക്കുകൾ പ്രകാരം  349     ബില്ലിയൻ  ഡോളറാണ് യുക്രൈൻറ്റെ  ഇതുവരെയുള്ള  നഷ്ടം.   ചില സാമ്പത്തിക വിദഗ്‌ധർ  കണക്കാക്കിയിട്ടുള്ളത്   750 മുതൽ 1000  ബില്യൺ ഡോളറിൻറ്റെ  നഷ്ടമാണ്  യുക്രൈന്  മൊത്തത്തിൽ  ഉണ്ടായിട്ടുള്ളതെന്നാണ്.

പ്രവചനാതീതമായ  ആരോഗ്യപ്രശ്നങ്ങൾ 

ബ്രഹ്മപുരത്തെ  ചവറുകൂന തീകത്തിയപ്പോൾ ആ പ്രദേശത്തുള്ളവർ അനുഭവിച്ച   ശാരീരിക പ്രശ്നങ്ങൾ   നമുക്ക് അറിവുള്ളതാണല്ലോ.  തീ കത്തിയ സമയത്തു മാത്രമല്ലാ,   ഇനിയുള്ള കുറെ വർഷങ്ങൾ പ്രദേശ വാസികൾ ശ്രദ്ധിക്കണമെന്നാണ് ആരോഗ്യ വിദഗ്ദ്ധർ  മുന്നറിയിപ്പ് നൽകിയത്.  സംസ്ഥാന ആരോഗ്യ വകുപ്പ് ബ്രഹ്മപുരത്തു നിയോഗിച്ച നോഡൽ ഓഫീസറും  ആലപ്പുഴ സർക്കാർ മെഡിക്കൽ കോളേജിലെ  ശ്വാസകോശ വിഭാഗം പ്രൊഫസറുമായ ഡോ .പി.എസ് .ഷാജഹാൻറ്റെ  അഭിപ്രായത്തിൽ, .  മാലിന്യം കത്തുമ്പോൾ  താലേറ്റ്‌സ്‌ , ഡയോക്സിൻ എന്നിവ  പോലുള്ള   നിരവധി  രാസ ഘടകങ്ങളുമുണ്ടാകുന്നു.  ഇവ  വര്ഷങ്ങളോളം ശരീരത്തിൽ കിടന്ന്‌ മാരകമായ രോഗങ്ങളും, ജനിതകമായതും പ്രത്യുത്പാദന സംബന്ധമായതുമായ പ്രശ്നങ്ങൾ പോലും ഉണ്ടാക്കാം.  ഇതൊക്കെ നമുക്ക്   ഭാവിയിലേ  പറയാൻ പറ്റൂ . പെട്ടെന്നുണ്ടാകുന്ന ശ്വാസകോശ  പ്രശ്നങ്ങൾ നേരത്തെ പറയാൻ പറ്റുമെങ്കിലും  മറ്റുള്ള ആരോഗ്യപ്രശ്നങ്ങൾക്കുള്ള സാധ്യത ചിലപ്പോൾ പത്തോ ഇരുപതോ വർഷങ്ങൾ കഴിഞ്ഞാകും ഉണ്ടാകുക.

 ബ്രഹ്മപുരത്ത്   ആറ്  ലക്ഷം ടണ്ണിൽ  താഴെമാത്രമുള്ള പ്ലാസ്റ്റിക്  ഉൾപ്പെടെയുള്ള  മാലിന്യങ്ങൾ കത്തിയതിൽ നിന്നും ഉണ്ടായ   കാർബൺ ഡയോക്സൈഡ്  , ഡയോക്സിൻ മുതലായ  വിഷവാതകങ്ങളാണ്    ആരോഗ്യപ്രശ്നങ്ങൾ  ഉണ്ടാക്കുന്നതെങ്കിൽ ,  യുക്രൈൻ  യുദ്ധത്തിൽ അതിലേറെ  മാരകമായ നിരവധി വിഷവസ്തുക്കളാണ് ബോംബുകൾ,  ഷെല്ലുകൾ, മൈനുകൾ, റോക്കറ്റുകൾ    തുടങ്ങിയ  വെടിക്കോപ്പുകളിലൂടെ     വിവിധ പ്രദേശങ്ങളിൽ  ഉണ്ടായിക്കൊണ്ടിരിക്കുന്നത്.  ഭൂമിയുടെ  പരിസ്ഥിതിക്കും ഈ പ്രപഞ്ചത്തിനാകെയും ഈ   യുദ്ധം വരുത്തുന്ന കെടുതികൾ നാം അനുഭവിക്കാൻ ഇരിക്കുന്നതേയുള്ളു.  യുദ്ധം അവസാനിച്ചാൽ പോലും പ്രകൃതിക്ക്  അതുണ്ടാക്കിയ ആഘാതവും ദുരിതവും വർണ്ണനാതീതമായിരിയ്ക്കും . എണ്ണ ശുദ്ധീകരണശാലകൾ, എണ്ണ  സംഭരണ ശാലകൾ, എണ്ണ കിണറുകൾ , എണ്ണ കുഴലുകൾ , ഖനികൾ, വ്യവസായ ശാലകൾ, കാർഷിക സ്ഥലങ്ങൾ   തുടങ്ങി നിരവധി  മേഖലകൾ യുദ്ധത്തിൽ    തകർത്തത്   അവിടത്തെ വായുവും  , മണ്ണും,   ,ഉപരിതല-ഭൂഗർഭജലവുമൊക്കെ  മലിനമാക്കി.  ഭൂമി, വായു , ജലം എന്നിവയുടെ   മലിനീകരണത്തിലൂടെ മാത്രം   സാമ്പത്തികമായി  51.4 ബില്യൺ   ഡോളറിൻറ്റെ  നഷ്ടമാണ്   ഉണ്ടായിട്ടുള്ളത്  എന്നാണ്   യുക്രൈൻ  പരിസ്ഥിതി സംരക്ഷണ മന്ത്രാലയം പുറത്തുവിട്ട രേഖകളിൽ പറയുന്നത്. . 

യുദ്ധ കെടുതിയിൽ   വനങ്ങളും 

എൻവയർമെന്റ്  പ്യൂപ്പിൾ  ലോ  എന്ന പരിസ്ഥിതി  സന്നദ്ധ സംഘടനക്കുവേണ്ടി   കാറ്ററിന പോളിയൻസ്ക  എന്ന  പരിസ്ഥിതി  ഗവേഷക നടത്തിയ പഠനത്തിലൂടെ യുദ്ധം ഉണ്ടാക്കിയ പ്രകൃതി ദുരന്തത്തിൻറ്റെ    യഥാർത്ഥ ചിത്രം, വെളിപ്പെടുത്തപ്പെട്ടു .  ആർക്കും ചിന്തിക്കാൻ കഴിയാത്ത രീതിയിലുള്ള  ദുരന്തമാണ്  യുക്രൈനിലെ പരിതസ്ഥിതിക്ക്‌  യുദ്ധം മൂലം   ഉണ്ടായത്.   റോക്കറ്റുകളിൽ നിന്നും, മിസ്സൈലുകളിൽ നിന്നും, ടാങ്കുകളിൽ നിന്നും  തൊടുത്തുവിട്ട  ബോംബുകൾ പൊട്ടിത്തെറിച്ചു  നിരവധി ജീവനുകൾ പൊലിഞ്ഞതിനു പുറമേ, വന്യ മൃഗങ്ങൾ ഉൾപ്പെടെയുള്ള ജീവജാലങ്ങളും, വനങ്ങളും, കൃഷിസ്ഥലങ്ങളുമൊക്കെ  നശിപ്പിക്കപ്പെട്ടു. സ്ഫോടനങ്ങളിലൂടെ  മാരകവും വിഷലിപ്തവുമായ  രാസഘടകങ്ങൾ വായുവിലും, മണ്ണിലും, ജലത്തിലും അലിഞ്ഞിറങ്ങി, അവയൊക്കെ ഉപയോഗശൂന്യമാക്കി.   ഭൂഗർഭ ജലം പോലും മലിനമാക്കപ്പെട്ടു. ശുദ്ധമായ കുടിവെള്ളം   പലസ്ഥലങ്ങളിലും ജനങ്ങൾക്ക്  ലഭിക്കുന്നില്ല. 40  ലക്ഷം ജനങ്ങളാണ് ശുദ്ധമായ കുടിവെള്ളം    ലഭിക്കാതെ ദുരിതമനുഭവിക്കുന്നത്.   ജനവാസ കേന്ദ്രങ്ങളിലെ 15.2  ബില്യൺ ടൺ  കോൺക്രീറ്റ് കെട്ടിടങ്ങളുടെ അവശിഷ്ടങ്ങളാണ്   നഗര പ്രദേശങ്ങളിൽ   കൂമ്പാരമായി കിടക്കുന്നത് .     ആദ്യത്തെ രണ്ടു മാസങ്ങൾക്കുള്ളിൽ  തന്നെ ,  റഷ്യയുടെ  3,25,000  ടൺ  സൈനിക വാഹനങ്ങൾ  പാതയോരങ്ങളിൽ   നശിപ്പിക്കപ്പെട്ടു .   . സ്‌ഫോടനങ്ങളിലൂടെ  ഭൂമിയിലുണ്ടായ   വിള്ളലുകളിൽ എല്ലാം  മാരകമായ   ഫോസ്‌ഫറസ്‌ ഉൾപ്പെടെയുള്ള  രാസപദാർത്ഥങ്ങൾ  മാറ്റപ്പെടാതെ  കിടപ്പുണ്ട്. ബോംബുകളിലെ ചില രാസപദാർത്ഥങ്ങളുടെ  സാന്നിദ്ധ്യത്തിലൂടെ  പൊള്ളൽ, ലുക്കേമിയ, ട്യൂമർ, കാൻസർ   തുടങ്ങിയ രോഗങ്ങൾ ഉണ്ടാകാനും  സാധ്യതയുണ്ട്.    ഫോസ്‌ഫറസ്‌   ശ്വസിച്ചാൽ  തൊണ്ടക്കും, കണ്ണിനുമൊക്കെ  അസ്വസ്ഥതയുണ്ടാകും .  ഇതിൻറ്റെ  അളവ്  ശരീരത്തിനുള്ളിൽ  കൂടുതൽ പ്രവേശിച്ചാൽ  കരൾ, കിഡ്നി   എന്നീ   അവയവങ്ങൾക്ക് തകരാറുണ്ടാകാൻ  സാധ്യതയുണ്ട്  . ശാസ്ത്ര   പഠനങ്ങൾ പറയുന്നത് 48  ശതമാനത്തിനു മുകളിൽ ഫോസ്‌ഫറസ്‌  ശരീരത്തിനുള്ളിൽ കയറിയാൽ, മരണത്തിലേക്കുവരെ നയിക്കാം എന്നാണ്.    ഡോൾഫിൻ ഉൾപ്പെടെ  നൂറുകണക്കിന്   കടൽ ജീവികളും  കരിങ്കടലിൽ   ചത്ത് പൊങ്ങി.  വനങ്ങളിൽ  ഉണ്ടായ   ബോംബ്  സ്‌ഫോടനങ്ങളിൽ,   കൊല്ലപ്പെട്ട വന്യജീവികളുടെ  ജഡങ്ങളും , അസ്ഥികൂടങ്ങളും   മറവുചെയ്യപ്പെടാതെ  കിടക്കുന്നു .  അംഗഭംഗം  വന്ന നിരവധി വന്യജീവികൾ    ആരാരും പരിചരിക്കപ്പെടാതെ  നരകയാതന അനുഭവിക്കുന്നു.   നൂറും നൂറ്റമ്പതും  വര്ഷങ്ങളുടെ വളർച്ചയുള്ള  കൂറ്റൻ വൃക്ഷങ്ങൾ  സ്‌ഫോടനങ്ങളിൽ നശിച്ചു.ഇരുപത്  ലക്ഷത്തിലേറെ ഹെക്ടർ  വനപ്രദേശമാണ്  റഷ്യൻ ആക്രമണത്തിൽ നശിച്ചത്.   ഇവയൊക്കെ പ്രകൃതിയുടെ സന്തുലിതാവസ്ഥയെ  പ്രതികൂലമായി ബാധിക്കും  എന്ന് മാത്രമല്ല  ആഗോളതാപന വര്ധനവിലേക്കു നയിക്കുകയും ചെയ്യും.

ചെർണോബില്ലിൽ  നിന്നും ആണവവികിരണം 

1986 ൽ ഉണ്ടായ അപകടത്തെത്തുടർന്ന്  ഉപേക്ഷിക്കപ്പെട്ട  ചെർണോബിൽ  ആണവ നിലയവും, യൂറോപ്പിലെ ഏറ്റവും വലിയ ആണവ നിലയമായ സാപോരിശിയ ആണവ നിലയവും  റഷ്യൻ സേന യുദ്ധത്തിൻറ്റെ  യുദ്ധത്തിനിടെ   പിടിച്ചെടുത്തു.  ചെര്ണോബിൽ  അപകടത്തെത്തുടർന്ന് ഉണ്ടായ  ആണവ വികിരണം  വ്യാപിച്ചതിൻറ്റെ  പശ്ചാത്തലത്തിൽ   4143  ചതുരശ്ര  കിലോമീറ്റർ  പ്രദേശം "എക്‌സ്‌ക്‌ളൂസീവ്  സോൺ" ആയി പ്രഖ്യാപിക്കുകയും അവിടെയുള്ള മുഴുവൻ ജനങ്ങളെയും സുരക്ഷിതമായ മറ്റു സ്ഥലങ്ങളിലേക്ക് മാറ്റുകയും ചെയ്തശേഷമാണ് 2000 ൽ  ചെർണോബിൽ  ആണവ നിലയത്തിൻറ്റെ  പ്രവർത്തനം അവസാനിപ്പിച്ചത്.  എന്നാൽ ഈ ആണവ നിലയം പിടിച്ചെടുത്ത റഷ്യൻ സൈനികർ അതിൻറ്റെ  ചുറ്റും   ആഴത്തിലുള്ള  കിടങ്ങുകൾ കുഴിച്ച്   ആണവനിലയത്തിന്    സംരക്ഷണം  ഒരുക്കിയിട്ടുള്ളതിലൂടെ    അപകടകരമായ  റേഡിയോആക്റ്റിവ് വികിരണങ്ങൾ  പുറത്തേക്കു വ്യാപിക്കുവാൻ    ഇടയാക്കുമെന്നാണ് പാശ്ചാത്യ ആണവ ശാസ്ത്രഞ്ജർ  അഭിപ്രായപ്പെടുന്നത്.

മലിനീകരണം പരത്തി  കാർബൺ ഡയോക്‌സൈഡ് 

യുദ്ധം  ആരംഭിച്ച  2022  ഫെബ്രുവരിക്കു ശേഷമുള്ള  ഏഴ്  മാസകാലയളവിൽ 82.8 ദശലക്ഷം മെട്രിക് ടൺ  കാർബൺ  ഡയോക്‌സൈഡ്  ആണ്  സ്ഫോടനങ്ങളിലൂടെ  യുക്രൈൻറ്റെ  അന്തരീക്ഷത്തിൽ  എത്തിയത്.  ,  സിംഹഭാഗം  കാർബൺ മാലിന്യങ്ങൾ നിർഗമിച്ചതു   യുദ്ധത്തിൽ  തകർന്നടിഞ്ഞ കെട്ടിടങ്ങൾ ഉൾപ്പെടെയുള്ള നിർമ്മിതികളിൽ  നിന്നുമായിരുന്നു.   യുദ്ധത്തിൽ തകർന്ന കെട്ടിട അവശിടങ്ങളിൽ നിന്നും 15.2  ദശ ലക്ഷം കാർബൺ ഡയോക്‌സൈഡ് ആണ് പുറത്തു വന്നത്.  തകർന്ന കെട്ടിടങ്ങൾ പുനർനിർമ്മിക്കുന്ന അവസരത്തിൽ 48.7  ദശ ലക്ഷം കാർബൺ ഡയോക്‌സൈഡ്  അന്തരീക്ഷത്തിൽ പടരും.     യുക്രൈൻ  പരിസ്ഥിതി സംരക്ഷണ മന്ത്രാലയത്തിൻറ്റെ  കണക്കുകൾ പ്രകാരം 2021 ലേതിനേക്കാൾ, 2022 ൽ 23  ശതമാനമാണ് , യുദ്ധം തുടങ്ങി ആറ് മാസങ്ങൾക്കുള്ളിൽ , കാർബൺ മലിനീകരണത്തിൻറ്റെ   വർദ്ധനവ്.  ഇതിൻറ്റെ  വ്യാപനം യുക്രൈനിൽ  മാത്രമായി ഒതുങ്ങി നിൽക്കുകയില്ല. ഇത് മറ്റു  യൂറോപ്യൻ  രാജ്യങ്ങളിലേക്കും വ്യാപിക്കും. 

റഷ്യ നടത്തിയ "എക്കോസൈഡ് "

യുദ്ധത്തിൽ  നേരിട്ട് ഉണ്ടായിട്ടുള്ള നാശനഷ്ടങ്ങളേക്കാൾ തീക്ഷണമുള്ളതായിരുക്കും,   വരുംകാലങ്ങളിൽ  പ്രകൃതിക്കു  സംഭവിക്കാൻ  പോകുന്ന   കെടുതികൾ     എന്നാണ് പരിസ്ഥിതി  ശാസ്ത്രഞ്ജർ നൽകുന്ന മുന്നറിയിപ്പ്.  ഭീകരമായ  ബോംബിങ്ങിലൂടെ  കാർഷിക  മേഖലകളും, ജലസേചന പദ്ധതികളും, വനങ്ങളും, പ്രകൃതി വിഭവങ്ങളുമെല്ലാം  നശിപ്പിക്കപ്പെട്ടു.  യുക്രയിൻറ്റെ  മാത്രമല്ല, യൂറോപ്പിന്റെ തന്നെ കാലാവസ്ഥയിൽ  മാറ്റം ഉണ്ടാക്കുവാൻ   ഇതിടയാക്കും. സ്വാഭാവികമായുള്ള   പരിസ്ഥിതി  അട്ടിമറിക്കാൻ ശ്രമിക്കുന്ന "എക്കോസൈഡ് " (ECOCIDE)  ആണ്   യുദ്ധത്തിലൂടെ        റഷ്യ നടത്തിയിട്ടുള്ളതെന്നാണ്   യുക്രൈൻ  പരിസ്ഥിതി സംരക്ഷണ  മന്ത്രാലയം  ആരോപിക്കുന്നത്.  ഇതിനുള്ള നഷ്ടപരിഹാരം   റഷ്യയിൽ നിന്നും നിയമപരമായി ലഭിക്കാനും, പ്രകൃതിക്കും,പരിസ്ഥിതിക്കും ലക്കും ലഗാനുമില്ലാതെ ആക്രമണങ്ങളിലൂടെ കനത്ത  നാശനഷ്‌ടം  വരുത്തിയ   റഷ്യയെ  അന്തർദേശിയ ക്രിമിനൽ കോടതിയുടെ വിചാരണക്കു വിധേയമാക്കുവാനും,  ഐക്യ രാഷ്ട്ര സഭയിലെ മറ്റു രാജ്യങ്ങളുടെ സഹായം വേണമെന്ന്  യുക്രൈൻ  പ്രസിഡണ്ട്  വോളോഡിമിർ സെലെൻസ്കി 2022   നവംബറിൽ ഈജിപ്തിൽ വച്ച് നടന്ന (COP-27 ) കാലാവസ്ഥ വ്യതിയാന കോൺഫറൻസിൽ ആവശ്യപ്പെട്ടു.  റഷ്യ  ഏകപക്ഷീയമായി തുടങ്ങിയ  യുദ്ധത്തിലൂടെ  ആഗോള  താപനത്തിൻറ്റെ  തോത് വർധിക്കാൻ ഇടയാക്കുമെന്നും  അന്തർദേശിയ   ക്രിമിനൽ കോടതിയുടെ  വിചാരണയിലൂടെ    യുക്രൈൻറ്റെയും യൂറോപ്പിൻറ്റെ ആകെയും    പരിസ്ഥിതിക്കും, പ്രകൃതിക്കും  അപരിഹാര്യമായ  നഷ്ടം ഉണ്ടാക്കിയ  റഷ്യയെ  അന്തർദേശിയ സമൂഹത്തിനു മുമ്പിൽ  തുറന്നു കാട്ടാമെന്നും  യുക്രൈൻ  കരുതുന്നു.

പി.എസ്‌ .ശ്രീകുമാർ   9847173177 

ഡോ .കെ.ആർ.ജ്യോതികുമാരി  9447213847 

പിന്നിടുകയാണ് 

 

 

                ദുരിതാശ്വാസ  നിധിയിൽ  കയ്യിട്ടുവാരുന്നവർ 

അഡ്വ. പി.എസ് .ശ്രീകുമാർ 

സാമ്പത്തികമായി ബുദ്ധിമുട്ടു അനുഭവിക്കുന്ന ജനങ്ങൾക്കുണ്ടാകുന്ന  രോഗങ്ങൾക്ക് ചികിത്സാ  സഹായം  നൽകുക, അപകട മരണങ്ങൾക്ക് ഇരയാകുന്ന ആശ്രിതരെ സഹായിക്കുക, തൊഴിൽ നഷ്ടപ്പെട്ടു ദുരിതത്തിലാകുന്ന തൊഴിലാളികൾക്ക് സൗജന്യ റേഷൻ അനുവദിക്കുക, പ്രകൃതി ദുരന്തങ്ങളാൽ ദുരിതമനുഭവിക്കുന്ന കുടുംബങ്ങൾ, വ്യക്തികൾ തുടങ്ങിയവർ ഉൾപ്പെടെ അർഹരും ആവശ്യക്കാരുമായ ആളുകൾക്ക് അടിയന്തിരമായി ആശ്വാസം ലഭ്യമാക്കുന്നതിനുള്ള സഹായപദ്ധതിയാണ്  മുഖ്യമന്ത്രിയുടെ ദുരിതാശ്വാസ  നിധി.

ദുരിതാശ്വാസ നിധിയിൽ നിന്നും  ധന സഹായം നല്കുന്നതിനായി , സർക്കാർ  റവന്യൂ വകുപ്പിൽനിന്നും മാർഗരേഖകൾ പലപ്പോഴായി ഇറക്കിയിട്ടുണ്ട്.  ഇതിൽ ഏറ്റവും പ്രധാനം  ഈ ദുരിതാശ്വാസ നിധിയിൽ നിന്നും ധന സഹായം  ലഭിക്കുന്നതിനുള്ള വരുമാന പരിധി ഒരു ലക്ഷം രൂപയാണെന്നതാണ്.  സ.ഉ.(എം എസ് )144 / 12 /റെവ  എന്ന നമ്പറിൽ 11/ 04/ 2012ലാണ് ഈ ഉത്തര ഇറങ്ങിയിട്ടുള്ളത്.  നിശ്ചിത മാതൃകയിലുള്ള അപേക്ഷ  അംഗീകൃത മെഡിക്കൽ ഓഫീസർ ,  ആറ്  മാസ കാലാവധിക്കകത്തു  നൽകിയ മെഡിക്കൽ സർട്ടിഫിക്കറ്റ്  സഹിതം   cmo.kerala .gov.in  എന്ന വെബ്സൈറ്റിലൂടെയോ, നേരിട്ടോ, അക്ഷയ കേന്ദ്രങ്ങൾ വഴിയോ എം.പി/ എം.എൽ.എ  മാർ മുഖേനയോ, കളക്ടറേറ്റുകൾ വഴിയോ,   അല്ലെങ്കിൽ തപാലിലോ മുഖ്യമന്ത്രിയുടെ  ഓഫീസിലേക്ക് നൽകാം.  രോഗവിവരം വ്യക്തമായി പ്രതിപാദിക്കുന്ന മെഡിക്കൽ സർട്ടിഫിക്കറ്റ് ആണ്  സമർപ്പിക്കേണ്ടത്.  അതിൽ ഡോക്ടറുടെ ഒപ്പ്, തീയതി, സീൽ എന്നിവ നിർബന്ധമായും ഉണ്ടായിരിക്കണം.  സാധാരണ രോഗങ്ങളായ ജലദോഷം, പനി, തലവേദന,വിമ്മിട്ടം, ശ്വാസംമുട്ടൽ,, ആസ്തമ, സന്ധിവേദന,തുടങ്ങിയവക്ക് മുഖ്യമന്ത്രിയുടെ ദുരിതാശ്വാസ നിധിയിൽ നിന്നും  ധനസഹായം ലഭിക്കുകയില്ല.  തീപിടുത്തം മൂലം  വാസഗൃഹങ്ങൾക്കും , ഇൻഷുറൻസ് എടുത്തിട്ടില്ലാത്ത ചെറുകിട കച്ചവട സ്ഥാപനങ്ങൾക്കും ഉണ്ടാകുന്ന നാശനഷ്ടങ്ങൾക്ക്  അപേക്ഷ നൽകുമ്പോൾ അതോടൊപ്പം  എഫ് ഐ ആർ, അഗ്നിശമന സേനയുടെ റിപ്പോർട്ട് എന്നിവയും അപേക്ഷയോടൊപ്പം നൽകണം.  അപകട മരണങ്ങൾക്ക് ഇരയാകുന്നവരുടെ ആശ്രിതർ  ധന സഹായത്തിനായി എഫ് ഐ ആർ , പോസ്റ്റ്ർമോട്ടം റിപ്പോർട്ട്, മരണ സർട്ടിഫിക്കറ്റ് എന്നിവ സഹിതം  ഒരു വർഷത്തിനുള്ളിൽ അപേക്ഷ നൽകണം.

ഒരു വ്യക്തിക്ക്  ഒരു തവണ മാത്രമേ ഒരേ ആവശ്യത്തിനായി ധനസഹായം അനുവദിക്കുകയുള്ളു.  എന്നാൽ, കാൻസർ, കിഡ്‌നി,  തുടങ്ങിയ ഗുരുതര  രോഗങ്ങളാൽ  ബുദ്ധിമുട്ടുന്നവരും , തുടർച്ചയായ ചികിത്സ ആവശ്യമുള്ളവർക്കും    അവരുടെ പ്രത്യേക സാഹചര്യം  പരിഗണിച്ച്,  ഒരിക്കൽ ധനസഹായം  അനുവദിച്ചതാണെങ്കിലും രണ്ടു വർഷത്തിന് ശേഷം വീണ്ടും അപേക്ഷ നൽകാവുന്നതാണ്.

ദുരിതാശ്വാസ നിധിയിൽ നിന്നുമുള്ള ധനസഹായം അനുവദിക്കുന്നതിന്റ്റെ ഉത്തരവാദിത്വം റവന്യൂ വകുപ്പിനാണെങ്കിലും,  ഈ നിധിയിലെ അക്കൗണ്ടുകൾ ഓപ്പറേറ്റ്  ചെയ്യുന്നത് ധനകാര്യ  വകുപ്പ്  സെക്രട്ടറിയാണ് .  അതിനാൽ ദുരിതാശ്വാസ നിധിയിലേക്കുള്ള സംഭാവനകൾ അയക്കേണ്ടത്  ധനകാര്യ സെക്രട്ടറിയുടെ പേരിലുള്ള അക്കൗണ്ടിൽ ആണ്. സർക്കാരിന്റെ നിലവിലുള്ള ഉത്തരവ് പ്രകാരം,  മുഖ്യമന്ത്രിയുടെ ദുരിതാശ്വാസ നിധിയിൽ നിന്നും   10,000  രൂപവരെ  അതാത്  ജില്ലാ കളക്ടർമാർക്ക്  അനുവദിക്കാം. 10,000  മുതൽ 15,000  രൂപവരെയുള്ള ധനസഹായം റവന്യൂ സ്പെഷ്യൽ സെക്രട്ടറിയും   25,000  രൂപവരെയുള്ളവ റവന്യൂ മന്ത്രിയും  , അതിനുമുകളിൽ   3,00,000   രൂപവരെയുള്ള ധനസഹായം മുഖ്യമന്ത്രിയുമാണ് അനുവദിക്കുന്നത്.  മൂന്നു ലക്ഷം   രൂപക്ക്  മുകളിലുള്ള  ധന സഹായം അനുവദിക്കാൻ അധികാരമുള്ളത് മന്ത്രിസഭക്കാണ്.  ദുരിതാശ്വാസ നിധിയിൽ നിന്നും  ധന സഹായം ആവശ്യപ്പെട്ടുകൊണ്ട്  മുഖ്യമന്ത്രിക്ക്   ലഭിക്കുന്ന അപേക്ഷകൾ കൈകാര്യം ചെയ്യാനായി  മുഖ്യമന്ത്രിയുടെ ഓഫീസിനോടനുബന്ധിച്ചു  ഒരു ഉയർന്ന ഉദ്യോഗസ്ഥന്റെ കീഴിൽ പ്രത്യേക സെൽ പ്രവർത്തിക്കുന്നുണ്ട്.  സെക്രട്ടറിയേറ്റിലെ  റവന്യൂ വകുപ്പിലും, ജില്ലാ കലക്ടറേറ്റുകളോടനുബന്ധിച്ചും  ദുരിതാശ്വാസ അപേക്ഷകൾ കൈകാര്യം ചെയ്യാൻ  ഉന്നത ഉദ്യോഗസ്ഥരുടെ നിയന്ത്രണത്തിൽ  പ്രത്യേക സംവിധാനങ്ങൾ  നിലവിലുണ്ട്.  ഇതിനെല്ലാം പുറമേ ,  ദുരിതാശ്വാസ നിധിയുമായി ബന്ധപ്പെട്ട  കണക്കുകൾ കംട്രോളർ ആൻഡ്  അക്കൗണ്ടന്റ് ജനറലിൻറ്റെ  ഓഡിറ്റിന് വിധേയവുമാണ്. 

വര്ഷങ്ങളായി സർക്കാർ ഒരുക്കിയിട്ടുള്ള   സംവിധാനങ്ങളെയെല്ലാം   നോക്കുകുത്തിയാക്കിയാണ്   ചില  രാഷ്ട്രീയ ഇടനിലക്കാരും,  പുഴുക്കുത്തുകളായി അധഃപതിച്ച  ഉദ്യോഗസ്ഥരിൽ  ചിലരും  ചേർന്ന് ദുരിതാശ്വാസ നിധിയിൽ  തട്ടിപ്പും തിരിമറിയും നടത്തിയത്. രാഷ്ട്രീയ പിടിപാടുള്ള പത്തനാപുരത്തെ ഒരു ഡോക്ടർ  ദുരിതാശ്വാസ നിധിയിൽ നിന്നും സഹായം ലഭിക്കാനായി 1500  മെഡിക്കൽ സര്ടിഫിക്കറ്റുകൾ  നൽകിയത്   ഇത്ര നാളും  പിടിക്കപ്പെടാതെ പോയത്  ഈ സംവിധാനത്തിന് നേതൃത്വം കൊടുക്കുന്നവരുടെ കെടുകാര്യസ്ഥതിയിലേക്കാണ്  വിരൽ ചൂണ്ടുന്നത്.  മതിയായ  ചികിത്സ രേഖകൾ പോലുമില്ലാതെയാണ്   ധന സഹായം അനുവദിച്ചിട്ടുള്ളതെന്നാണ്  സംസ്ഥാനത്തിന്റെ  വിവിധ  ഭാഗങ്ങളിലുള്ള  താലൂക്ക് ഓഫീസുകളിൽ  വിജിലൻസ് നടത്തിയ പരിശോധനയിൽ പുറത്തു വന്നിട്ടുള്ളത്.    പത്തനംതിട്ട ജില്ലയിലെ ഒരു വില്ലജ് ഓഫീസിൽ ലഭിച്ച 268 അപേക്ഷകളിൽ എല്ലാം നൽകിയിരിക്കുന്നത് ഒരേ മൊബൈൽ ഫോൺ നമ്പർ ആണ്. ഒരു താലൂക്കിലെ 78  അപേക്ഷകളിൽ ഒരു ആയുർവേദ  ഡോക്ടർ നൽകിയ  സർട്ടിഫിക്കറ്റ് ആയിരുന്നു   എല്ലാവരും ഹാജരാക്കിയത്.  ഇങ്ങനെ  സംഘടിതമായിട്ടാണ് തട്ടിപ്പു നടത്തിയിട്ടുള്ളത്.  സാധാരണഗതിയിൽ, ഏറ്റവും കൂടുതൽ അപേക്ഷകൾ സമർപ്പിക്കപ്പെടുന്നത് ജനപ്രതിനിധികളിലൂടെയാണ്.  ആപേക്ഷകളുമായി  വരുന്നവരുടെ നിജ സ്ഥിതി പരിശോധിക്കാനുള്ള സംവിധാനം  എം എൽ എ മാരും, എം.പി മാരും  ഉൾപ്പെടെയുള്ള ജനപ്രതിനിധികൾക്ക് ഇല്ല.  അവർ  ശുപാർശ ചെയ്തുകൊടുക്കുന്ന അപേക്ഷകൾ പരിശോധിച്ച്   മേൽ നടപടി എടുക്കേണ്ടത് വില്ലജ് ഓഫീസുകൾ മുതലുള്ള റവന്യൂ വകുപ്പിൻറ്റെ  ഉത്തരവാദിത്വമാണ്.  എവിടെയാണ് പാളിച്ച ഉണ്ടായതെന്ന് വിശദമായ അന്വേഷണം നടത്തി കണ്ടെത്തേണ്ടതുണ്ട്.  ഒന്നാം  പിണറായി സർക്കാരിന്റെ  ഭരണ കാലയളവിൽ  അർഹരല്ലാത്ത ചിലർക്ക് സർക്കാരിന്റെ രാഷ്ട്രീയ  ചായ്‌വിന്റെ  അടിസ്ഥാനത്തിൽ  ദുരിതാശ്വാസ നിധിയിൽ നിന്നും സഹായധനം അനുവദിച്ചതിനെതിരെയുള്ള കേസ്, വിധിപറയാനായി ലോകായുക്തയുടെ മുന്നിൽ ഇപ്പോൾ തന്നെ ഉണ്ട്. അതിനേക്കാളും ഗുരുതരമായ ക്രമക്കേടുകളാണ് ഇപ്പോൾ വിജിലൻസ് പുറത്തു കൊണ്ടുവന്നിട്ടുള്ളത്.

സാമ്പത്തികമായി ബുദ്ധിമുട്ടനുഭവിക്കുന്നവരും, വിവിധ മാരക രോഗങ്ങളാൽ കഷ്ടപ്പെടുന്നവരുമായ  നൂറു കണക്കിന് പാവങ്ങളുടെ അവസാന  അത്താണിയാണ്   മുഖ്യമന്ത്രിയുടെ ദുരിതാശ്വാസ നിധി.  അതിനു മുകളിൽ ഇപ്പോൾ  ഉരുണ്ടുകൂടി  വന്ന കാർമേഘപടലങ്ങൾ നീക്കി അതിൻറ്റെ   വിശ്വാസ്യത  വീണ്ടെടുക്കേണ്ടത്  വളരെ അടിയന്തിരമായി ചെയ്യേണ്ട കാര്യമാണ്.  ഇപ്പോൾ ഉയർന്നുവന്ന  ആരോപണങ്ങളിൽമേൽ സമഗ്രമായ അന്വേഷണം നടത്തി  തട്ടിപ്പിനും ക്രമക്കേടുകൾക്കും ഒത്താശ ചെയ്ത രാഷ്ട്രീയ-ഉദ്യോഗസ്ഥ   കൂട്ടുകെട്ടിൽ ഉൾപ്പെട്ട എല്ലാവരെയും, രാഷ്ട്രീയത്തിനതീതമായി,  നിയമത്തിന്റെ മുന്നിൽ കൊണ്ടുവന്ന്  ശിക്ഷ ഉറപ്പുവരുത്തുവാൻ ആവശ്യമായ നടപടി സർക്കാർ കൈക്കൊള്ളണം.

അഡ്വ. പി.എസ് .ശ്രീകുമാർ 

(ഉമ്മൻചാണ്ടി മുഖ്യമന്ത്രിയായിരുന്നപ്പോൾ  പ്രൈവറ്റ് സെക്രട്ടറിയായിരുന്നു ലേഖകൻ)

9847173177